मुंबई, 25 ऑक्टोंबर: (विश्वजीत खाटमोडे) राष्ट्रवादीचे दिवंगत नेते बाबा सिद्दीकी यांचे पुत्र झिशान सिद्दीकी यांनी अजित पवार यांच्या राष्ट्रवादी काँग्रेस पक्षात जाहीर प्रवेश केला आहे. यावेळी राष्ट्रवादी काँग्रेस पक्षाचे अध्यक्ष अजित पवार, प्रदेशाध्यक्ष सुनील तटकरे यांच्यासह पदाधिकारी आणि कार्यकर्ते उपस्थित होते. दरम्यान, झिशान सिद्दीकी हे सध्या वांद्रे पूर्व मतदारसंघातील काँग्रेसचे आमदार आहेत. त्यानंतर राष्ट्रवादी काँग्रेसकडून आगामी विधानसभा निवडणुकीसाठी वांद्रे पूर्व मतदारसंघातून झिशान सिद्दीकी यांना उमेदवारी जाहीर करण्यात आली आहे. त्यामुळे विधानसभा निवडणुकीपूर्वी काँग्रेस पक्षाला मोठा धक्का बसला आहे.
https://x.com/ANI/status/1849650259426935117?t=jidRtcq1ySIhVad5sPaSTQ&s=19
https://x.com/AHindinews/status/1849660073947299945?t=d_0pjaQI_R_YmExEK2fMbA&s=19
झिशान सिद्दीकी यांनी मानले आभार
दरम्यान, राष्ट्रवादीने उमेदवारी दिल्याबद्दल झिशान सिद्दीकी यांनी पक्षाचे आभार मानले आहेत. यासंदर्भात त्यांनी प्रतिक्रिया दिली आहे. या कठीण काळात माझ्यावर दाखवलेल्या विश्वासाबद्दल मी अजित पवार, प्रफुल्ल पटेल, सुनील तटकरे आणि राष्ट्रवादी पक्षाचे आभार मानतो, असे ते यावेळी म्हणाले. ही जागा आपल्याला जिंकायची आहे, जनतेच्या हक्कासाठी लढायचे आहे, असे माझ्या वडिलांचे अधुरे स्वप्न होते. ही लढाई लढताना त्यांची हत्या झाली आणि माझ्या रक्तवाहिनीत त्यांचे रक्त आहे, असे त्यांनी म्हटले आहे. तसेच भविष्यातही मी त्यांची लढाई लढत राहीन. आम्ही वांद्रे पूर्वची जागा विक्रमी मतांनी जिंकू, असा विश्वास झिशान सिद्दीकी यांनी व्यक्त केला.
https://x.com/mahancpspeaks/status/1849674883908682043?t=SDp-__G9RwMJvf4POII8FA&s=19
राष्ट्रवादीत इंकमिंग सुरू!
झिशान सिद्दीकी यांच्यासह यावेळी भाजप नेते निशिकांत पाटील, भाजपचे माजी खासदार संजयकाका पाटील आणि भाजपचे माजी खासदार प्रतापराव चिखलीकर यांनीही अजित पवार यांच्या उपस्थितीत राष्ट्रवादीत प्रवेश केला आहे. त्यानंतर आगामी विधानसभा निवडणुकीसाठी राष्ट्रवादी पक्षाने निशिकांत पाटील यांना इस्लामपूर मतदारसंघातून उमेदवारी जाहीर केली आहे. तसेच संजयकाका पाटील यांना देखील राष्ट्रवादीने तासगाव – कवठेमहांकाळ मतदारसंघातून उमेदवारी दिली आहे. या निवडणुकीत इस्लामपूरमध्ये निशिकांत पाटील यांचा सामना राष्ट्रवादी काँग्रेस पार्टी शरदचंद्र पवार पक्षाचे प्रदेशाध्यक्ष जयंत पाटील यांच्यासोबत होणार आहे. तर तासगाव – कवठेमहांकाळ मतदारसंघात संजयकाका पाटील यांची लढत राष्ट्रवादीचे दिवंगत नेते आर आर पाटील यांचे पुत्र रोहित पाटील यांच्याशी होणार आहे. तसेच राष्ट्रवादीने प्रतापराव पाटील चिखलीकर यांना लोहा मतदारसंघातून उमेदवारी दिली आहे.
