शारदानगर, 8 मार्च: ॲग्रीकल्चरल डेव्हलपमेंट ट्रस्ट, बारामती संचलित कृषी विज्ञान केंद्र आणि शारदा महिला संघ यांच्या संयुक्त विद्यमाने जागतिक महिला दिन उत्साहात साजरा करण्यात आला. मागील 17 वर्षांपासून सुरू असलेल्या या परंपरेनुसार यंदाही शारदाबाई पवार शैक्षणिक संकुलात सामाजिक क्षेत्रात असामान्य कार्य करणाऱ्या महिलांचा आत्मविश्वास वाढावा आणि त्यांच्या कार्यास प्रेरणा मिळावी तसेच त्यांच्या कार्याचा गौरव तथा सन्मान व्हावा, यासाठी हा उपक्रम राबविण्यात आला.
शारदा सन्मान सोहळ्याचे आयोजन दिनांक 6 मार्च रोजी सकाळी 10 वाजता शारदानगर येथील आप्पासाहेब पवार सभागृहात करण्यात आले. महाराष्ट्रातील ग्रामीण आणि शहरी भागातील विविध क्षेत्रात उल्लेखनीय कार्य करणाऱ्या महिलांचा यावेळी सन्मान करण्यात आला. कार्यक्रमाची सुरूवात ढोल पथकाच्या गजरात मान्यवर आणि सत्कारमूर्ती महिलांच्या आगमनाने झाली. त्यानंतर संस्थेच्या विश्वस्त सुनंदा पवार आणि सत्कारमूर्ती महिलांनी दीपप्रज्वलन करून कार्यक्रमाचे उद्घाटन केले.
महिलांच्या सक्षमीकरणावर भर
यावेळी कार्यक्रमाच्या प्रस्ताविकेमध्ये सुनंदा पवार यांनी सभागृहातील महिला या माहेरपणासाठी आलेल्या आहेत त्यामुळे शारदानगरमध्ये दिवाळी साजरी करत आहोत असे वाटत असल्याचे म्हटले. यावेळी प्रस्ताविक भाषणात सुनंदा पवार यांनी महिलांच्या सशक्तीकरणावर भर दिला. “देशात आणि महाराष्ट्रात बेरोजगारीचे व महिला अत्याचाराचे प्रमाण वाढत चालले आहे. महिलांमध्ये अफाट ताकद असून त्या एका वेळी दहा गोष्टी करण्यास सक्षम आहेत. स्त्रियांनी स्वतःला सन्मानित करणे गरजेचे आहे. स्त्रियांमध्ये कॅन्सरचे प्रमाण वाढत चालले आहे. त्यामुळे स्त्रियांनी शारीरिक आरोग्याकडे लक्ष देणे गरजेचे आहे. तसेच वेळेवर आरोग्य तपासणी गरजेचे आहे. कुटुंबामध्ये पालकांचे अनुकरण मुले करतात, त्यामुळे पालकांनी मुलांना चांगले आणि वाईट याची जाणीव करून दिली पाहिजे. त्याचबरोबर तुमच्या आर्थिक परिस्थितीची जाणीव मुलांना करून दिली पाहिजे. महिलांनी सक्षम होण्याकरता वाचन केले पाहिजे, अभ्यास केला पाहिजे, मुक्तपणे काम केले पाहिजे,” असे मत त्यांनी व्यक्त केले.
सन्मान सोहळ्यात गौरव
त्यांच्या भाषणानंतर शारदा सन्मान पत्राचे वाचन संध्या सातपुते यांनी केले. त्यानंतर सत्कारमूर्ती महिलांचा पीपीटी सादरीकरणाद्वारे परिचय करून देण्यात आला. यावेळी राज्यभरातील विविध क्षेत्रात उल्लेखनीय योगदान देणाऱ्या 30 हून अधिक महिलांचा सन्मान करण्यात आला. यामध्ये इंदुमती कुटे, सोलापूर येथील मलम्मा गोडसे, डोंबिवली येथील नंदिनी जोशी पित्रे, अहमदनगर येथील प्रभादेवी घोघरे, कोल्हापूर येथील अनुराधा भोसले, अमरावती येथील स्वाती पाध्ये, कर्जत येथील मनसुख शेख, राशीन येथील लता मासाळ, अहमदनगर येथील ममताबाई भांगरे, कर्जत येथील कमल मोटे, पुणे येथील फातिमा चक्कीवाला, कात्रज येथील लहूबाई वाघमारे, जामखेड येथील सुरेखा सदाफुले, मिरजगाव येथील वंदना खेतमाळीस, जामखेड येथील रश्मी गंभीर, नाशिक येथील संगीता पिंगळे, अहमदनगर येथील सविता पांडे, पुणे येथील रोहिणी पवार, जामखेड येथील राणी नागरगोजे, मुंबई येथील सोनाली पालव, बारामती येथील जयश्री मोरे, पुणे येथील दीक्षा दिंडे, जामखेड येथील अश्विनी कोल्हे, कोपरगाव येथील आरती गांगर्डे, कोपरगाव येथील रेणुका काले, पुणे येथील वृषाली गुजर, सावंतवाडी येथील सिद्धी गावडे, अरणगाव येथील गौरी शेळके, माळशिरस येथील लता कोकणे, शारदानगर येथील मंगल धुमाळ, जामखेड येथील सरल बोराटे यांचा समावेश होता. यावेळी गुणवंत विद्यार्थिनींनी सर्व सत्कारमूर्तींचे औक्षण केले. त्यानंतर त्यांना माहेरचा आहेर म्हणून साडी-चोळी, सन्मानपत्र आणि संस्थेचे प्रतीक असलेले रोप भेट देऊन गौरवण्यात आले. हा सत्कार सुनंदा पवार यांच्या हस्ते करण्यात आला.
महिला बचत गटांचा गौरव
तसेच या कार्यक्रमात भीमथडीमध्ये उल्लेखनीय कार्य करणाऱ्या नऊ महिला बचत गटांचा देखील सन्मान करण्यात आला. शारदा महिला संघाच्या कर्ज वाटपाचा आढावा नागरे सर यांनी सादर केला. या कार्यक्रमाला बारामती, इंदापूर, दौंड, सोलापूर, अमरावती, नाशिक, जामखेड, कर्जत, पुणे, मुंबई आदी ठिकाणांहून तब्बल 2000 हून अधिक महिलांनी हजेरी लावली. या कार्यक्रमाचे सूत्रसंचालन संध्या सातपुते आणि अश्विनी दीक्षित यांनी केले, तर आभार प्रदर्शन गार्गी दत्ता यांनी केले.
