बारामती, 18 सप्टेंबरः तीन वेगवेगळ्या गुन्ह्यातील संशयित आरोपींना बारामती शहर पोलिसाच्या वेगवेगळ्या पथकांनी मोठ्या शर्तीने आज, 18 सप्टेंबर 2022 रोजी अटक केली आहे. अटक केलेल्यांपैकी संशयित आरोपी आदित्य गायकवाड (वय 20, रा. पानसरे अपार्टमेंट कृष्णाई लॉन्स) याने 14 डिसेंबर 2021 रोजी बारामतीमधीलच एका अल्पवयीन मुलीला फुस लावून पळून नेले होते. त्या दोघांचाही काहीही सुगावा त्या दिवसापासून लागत नव्हता. तांत्रिक गोष्टींचे विश्लेषण करूनही त्यांचा ठावठिकाणा मिळत नव्हता. त्याची माहिती काढून सदर आरोपीला पुणे शहरातून अटक केली आहे. सदर संशयित आरोपीवर पोस्को तसेच भादवी कलम 376 प्रमाणे गुन्हा कलमात वाढ करून पोलीस कोठडी रिमांड घेतली आहे.
निर्मला सीतारमण यांच्या बारामती दौऱ्यासंदर्भात बैठक संपन्न
दुसऱ्या घटनेत 23 ऑगस्ट 2022 पासून स्वतःच्या नात्यातील अल्पवयीन मुलीला ब्लॅकमेल करून बळजबरीने शारीरिक संबंध ठेवणाऱ्या क्षितिज उर्फ ऋतिक गरड (वय 22, रा. जेऊर तालुका करमाळा, सध्या रा. रुई फाटी) याला सुद्धा पोलिसांनी ठाणे शहरातून अटक केली आहे. त्याच्यावर सुद्धा पोस्को तसेच 376 अन्वये कारवाई केली आहे.
तिसऱ्या घटनेत होमगार्ड म्हणून काम करणारा सुजित घाडगे (वय 26, रा. गौतम नगर बारामती) हा संशयित आरोपी ओळखीचा फायदा घेत एका महिलेवर काही वर्षापासून शारीरिक संबंध ठेवले होते. तसेच तो त्या महिलेला मारहाण करणे, दमदाटी करणे, दुखापत करणे यासारख्या अत्याचार करत होता. यामुळे सदर आरोपीवर तात्काळ गुन्हा दाखल करून त्याला सुद्धा अटक केली आहे.
पोस्को गुन्ह्यातील दोन्ही आरोपींना सत्र न्यायाधीश गांधी आणि प्रथम वर्ग न्याय दंडाधिकारी आतकरे यांच्यासमोर रिमांडसाठी हजर केले आहे. या तिन्ही गुन्ह्यांचा तपास तसेच आरोपी अटकेची कारवाई पोलीस अधीक्षक डॉ. अभिनव देशमुख, अपर पोलीस अधीक्षक मिलिंद मोहिते तसेच उपविभागीय पोलीस अधिकारी गणेश इंगळे यांच्या मार्गदर्शनाखाली बारामती शहर पोलीस ठाण्याचे पोलीस निरीक्षक सुनील महाडिक आणि त्यांची टीम सहाय्यक पोलीस निरीक्षक प्रकाश वाघमारे, मुकुंद पालवे, संध्याराणी देशमुख, पोलीस कर्मचारी अंकुश दळवी, देवेंद्र खाडे, अनिल सातपुते, दशरथ कोळेकर, तुषार चव्हाण, दशरथ इंगोले यांनी केली आहे.
