वेल्हे, 11 मे: (विश्वजीत खाटमोडे) लोकसभा निवडणुकीच्या तिसऱ्या टप्प्यात बारामती मतदारसंघामध्ये मतदान पार पडले. या मतदानाच्या आदल्या दिवशी वेल्हे येथील पुणे जिल्हा मध्यवर्ती बँक रात्री उशिरापर्यंत सुरू होती. या प्रकरणी निवडणूक आयोगाने वेल्हे शाखेतील पुणे जिल्हा मध्यवर्ती बँकेच्या व्यवस्थापकावर निलंबनाची कारवाई केली. या कारवाईवर राष्ट्रवादी काँग्रेस पार्टी – शरदचंद्र पवार पक्षाचे आमदार रोहित पवार यांनी नाराजी व्यक्त केली आहे. ही निलंबनाची कारवाई धूळफेक असल्याचे त्यांनी म्हटले आहे. तसेच या बँकेतील त्या रात्रीचे रात्री सीसीटीव्ही फुटेज सार्वजनिक करण्याची मागणी देखील रोहित पवार यांनी यावेळी केली. या संदर्भात रोहित पवार यांनी एक ट्विट केले आहे.
https://twitter.com/RRPSpeaks/status/1789155215385706896?s=19
रोहित पवारांनी काय म्हटले?
पीडीडीसी बँकेच्या वेल्हा शाखेतील मॅनेजरवर झालेली निलंबनाची कारवाई ही धूळफेक आहे. मध्यरात्री त्या शाखेत कोण कोण होते? कशासाठी होते? कुणाच्या सांगण्यावरून होते? आणि काय व्यवहार झाले? या सर्व गोष्टींची सखोल आणि निष्पक्ष चौकशी होऊन कायदेशीर कारवाई झाली पाहिजे. तसेच त्या रात्रीचे सीसीटीव्ही फुटेज सार्वजनिक झालं पाहिजे. बारामती मतदारसंघातील निवडणुकीत गैरप्रकार करण्यासाठी या बँकेतून पैसा गेल्याचा आमचा आरोप असून तसे अनेक व्हिडिओ मी उघड केले आहेत. निवडणूक आयोगाने याची गंभीर दखल घ्यावी, अशी मागणी रोहित पवारांनी या ट्वीट मधून केली आहे. त्यामुळे निवडणूक आयोग याप्रकरणी कोणती भूमिका घेणार? हे पाहणे महत्त्वाचे ठरणार आहे.
व्यवस्थापकावर निलंबनाची कारवाई
दरम्यान, वेल्हे येथील ही पीडीडीसी बँक लोकसभा मतदानाच्या आदल्या दिवशी रात्री उशिरापर्यंत सुरू असल्याचा व्हिडिओ रोहित पवारांनी ट्विट केला होता. तसेच त्यांनी निवडणूक आयोगाकडे याप्रकरणी कारवाई करण्याची मागणी केली होती. त्यानंतर निवडणूक आयोगाने त्याची चौकशी करून सीसीटीव्ही फुटेजच्या आधारे या बँकेच्या व्यवस्थापकावर निलंबनाची कारवाई केली. तसेच या बँकेच्या व्यवस्थापकाच्या विरोधात आचारसंहितेचा भंग केल्याप्रकरणी गुन्हा दाखल करण्यात आला आहे. निवडणूक आयोगाला त्या रात्रीच्या सीसीटीव्ही फुटेजमध्ये या बँकेमध्ये 40 ते 50 कर्मचारी असल्याचे आढळून आले होते.
