बारामती, 18 एप्रिल: (विश्वजीत खाटमोडे) आगामी लोकसभा निवडणुकीसाठी बारामती मतदार संघाच्या महाविकास आघाडीच्या उमेदवार सुप्रिया सुळे यांनी आज त्यांचा उमेदवारी अर्ज दाखल केला आहे. यावेळी काँग्रेस नेते बाळासाहेब थोरात, शिवसेना उद्धव बाळासाहेब ठाकरे पक्षाचे पुणे जिल्हा संपर्क प्रमुख व आमदार सचिन अहिर, आमदार विश्वजित कदम, खासदार व शिरूर लोकसभा मतदारसंघाचे महाविकास आघाडीचे उमेदवार अमोल कोल्हे, आमदार संग्राम थोपटे, आमदार संजय जगताप, आमदार अशोक पवार, माजी आमदार जयदेव गायकवाड, युगेंद्र पवार, राष्ट्रवादी काँग्रेस पार्टी शरदचंद्र पवार पक्षाचे इंदापूर तालुकाध्यक्ष तेजसिंह पाटील, दाैंड तालुकाध्यक्ष आप्पासाहेब पवार, रामभाऊ टुले यांच्यासह महाविकास आघाडी व इंडिया आघाडीचे पदाधिकारी व कार्यकर्ते आदी उपस्थित होते.
https://twitter.com/supriya_sule/status/1780850674508714486?s=19
बाबासाहेबांच्या पुतळ्याला वंदन
दरम्यान, सुप्रिया सुळे यांनी आज लोकसभेचा उमेदवारी अर्ज दाखल करायला जाण्यापूर्वी घटनेचे शिल्पकार भारतरत्न डॉ. बाबासाहेब आंबेडकर यांच्या पुण्यातील पुतळ्याला वंदन केले. लोकशाहीच्या या सर्वात मोठ्या उत्सवात सहभागी होण्यास जाण्यापुर्वी संविधान निर्मात्या महामानवाचे आशीर्वाद माझ्यासाठी अतिशय मोलाचे आहेत, अशा सुप्रिया सुळे यावेळी म्हणाल्या. याप्रसंगी, महाविकास आघाडीचे अनेक नेते तसेच पदाधिकारी व कार्यकर्ते मोठ्या संख्येने उपस्थित होते.
सुप्रिया सुळे यांनी काय म्हटले?
उमेदवारी अर्ज भरल्यानंतर सुप्रिया सुळे यांनी ट्विट केले आहे. राष्ट्रवादी काँग्रेस पक्ष- शरदचंद्र पवार पक्षाच्या वतीने महाविकास आघाडीची अधिकृत उमेदवार म्हणून बारामती लोकसभा मतदारसंघातून मी ‘तुतारी फुंकणारा माणूस’ या चिन्हावर निवडणूक लढवित असल्याचे सुप्रिया सुळे यांनी या ट्विटमध्ये म्हटले आहे. “या निवडणूकीचा उमेदवारी अर्ज आज विधान भवन येथे आदरणीय पवार साहेब व त्यांच्यावर नितांत प्रेम करणारी जनता, महाविकास आघाडीचे नेते, पदाधिकारी व कार्यकर्ते यांच्या साक्षीने दाखल केला. आपल्या बारामती लोकसभा मतदारसंघातील जनतेचे आशीर्वाद, शुभेच्छा, अतूट विश्वास आणि भरघोस पाठबळ यांच्या जोरावर मला पुन्हा या मतदारसंघाचे लोकसभेत प्रतिनिधित्व करण्याची संधी मिळेल, हा विश्वास आहे. मायबाप जनतेची सेवा, महिला, शेतकरी, कष्टकरी, कामगार यांचा सन्मान आणि महाराष्ट्राचा स्वाभिमान कायम बुलंद राखण्यासाठी मी लढत आहे. या लढतीत मायबाप जनता माझ्या सोबत राहिल, याची मला खात्री आहे,” असे सुप्रिया सुळे यांनी ट्विटमध्ये म्हटले आहे.
