बुलढाणा, 02 एप्रिल: (विश्वजीत खाटमोडे) बुलढाणा जिल्ह्यातील खामगाव-शेगाव महामार्गावर एसटी बस, खासगी बस आणि बोलेरो या वाहनांचा तिहेरी अपघात झाल्याची घटना घडली आहे. ही घटना बुधवारी (दि.02) पहाटेच्या सुमारास घडली. या अपघातात 5 जणांचा मृत्यू झाला आहे. तर अनेकजण जखमी झाले आहेत. याची माहिती पोलिसांनी दिली आहे.
https://x.com/PTI_News/status/1907276664033468641?t=nftnUqvonOBX1F86WlRacA&s=19
असा झाला अपघात
प्राथमिक माहितीनुसार, खामगाव-शेगाव महामार्गावर आज पहाटेच्या सुमारास भरधाव वेगाने असलेली बोलेरो कार आणि एसटी बस यांच्यात अपघात झाला. या धडकेनंतर मागून येणारी खाजगी बसही या अपघातग्रस्त वाहनांना धडकली. या दुर्दैवी घटनेत 5 जणांचा जागीच मृत्यू झाला, तर या अपघातात अनेक प्रवासी जखमी झाले. या अपघातामुळे तीनही वाहनांचे मोठ्या प्रमाणात नुकसान झाले आहे.
जखमींवर रुग्णालयात उपचार
या अपघाताची माहिती मिळताच, स्थानिक रहिवासी आणि पोलिसांनी घटनास्थळी धाव घेतली. तसेच आपत्कालीन सेवा देखील घटनास्थळी दाखल झाल्या. त्यांनी बचावकार्य करून जखमींना तातडीने रुग्णालयात हलवले. जखमींवर सध्या रुग्णालयात उपचार सुरू आहेत. त्यातील काहींची प्रकृती गंभीर असल्याची माहिती समोर आली आहे. दरम्यान, या अपघातामुळे तेथे काही काळ वाहतूक कोंडी निर्माण झाली होती. त्यानंतर पोलिसांनी त्वरित रस्ता मोकळा करण्याची कार्यवाही केल्यामुळे या ठिकाणची वाहतूक पुन्हा पूर्ववत करण्यात आली.
पोलीस तपास सुरू
या अपघाताचे नेमके कारण स्पष्ट झालेले नाही, परंतु, वेगावर नियंत्रण सुटल्याने हा अपघात झाल्याचा प्राथमिक अंदाज आहे. सध्या पोलिसांकडून या घटनेचा अधिक तपास केला जात आहे. अपघातस्थळी उपस्थित असलेल्या प्रत्यक्षदर्शींच्या जबाबांची नोंद घेतली जात आहे.
