सोलापूर, 25 मार्च: (विश्वजीत खाटमोडे) येत्या लोकसभा निवडणुकीसाठी भाजपकडून सोलापूर मतदार संघात आमदार राम सातपुते यांना उमेदवारी जाहीर करण्यात आली आहे. या पार्श्वभूमीवर, सोलापूर लोकसभा मतदार संघातील काँग्रेसच्या उमेदवार आमदार प्रणिती शिंदे यांनी राम सातपुते यांना पत्र लिहिले आहे. त्यांनी त्यांचे हे पत्र सोशल मीडियावर पोस्ट केले आहे. ह्या उमेदवारीच्या निमित्ताने तुम्हाला जी संधी मिळालीये त्या बद्दल शुभेच्छा देते. मी सोलापूरची लेक म्हणून तुमचं सोलापूरात स्वागत करते, असे प्रणिती शिंदे यांनी या पत्रात म्हटले आहे. त्यांच्या या पत्राला राम सातपुते यांनी देखील उत्तर दिले आहे. दरम्यान, या दोन्ही पत्रांची चर्चा सध्या राजकीय वर्तुळात रंगली आहे.
https://twitter.com/ShindePraniti/status/1772109602559254864?s=19
प्रणिती शिंदे यांचे पत्र जसं च्या तसं!
“आपलं सोलापूर लोकसभेच्या निवडणुक रिंगणात स्वागत आहे! सोलापूर हे कायमच बहुभाषिक, बहुधार्मिक, सर्वधर्मसमभाव मानणारं शहर आणि जिल्हा आहे, इथे सर्वांना आपली मतं मांडण्याची मुभा मिळते, मग तो इथला असो किंवा बाहेरचा. मी सोलापूरची लेक म्हणून तुमचं सोलापूरात स्वागत करते. तसंच ह्या उमेदवारीच्या निमित्ताने तुम्हाला जी संधी मिळालीये त्या बद्दल शुभेच्छा देते. लोकांचे प्रश्न, त्यांच्या समस्या, त्यांच्या गरजा आणि मतदारसंघाचा विकास हेच कुठल्याही निवडणुकीच्या केंद्रस्थानी असणं अपेक्षित असतं. लोकशाहीत जनहिताचे मुद्दे आणि संवाद यांना सर्वात जास्त महत्व असावं असं माझं मत आहे. पुढील 40 दिवस याचं भान राखून, लोकशाहीचा आदर करत, आपण विचारांची लढाई लढत एकमेकांविरुद्ध उभे राहू 3 आणि समाजात फूट न पाडता, समाजाचा एकत्रित विकास होण्यासाठी काय करू शकतो यावर लढाई लढू, अशी मी आशा करते. सोलापूरकरांच्या वतीने पुन्हा एकदा तुमचं सोलापूरात स्वागत करते आणि तुम्हाला शुभेच्छा देते,” अशा प्रणिती शिंदे या पत्रामध्ये म्हणाल्या आहेत. तर त्यांच्या या पत्राला राम सातपुते यांनी उत्तर दिले आहे.
https://twitter.com/RamVSatpute/status/1772146673071861768?s=19
राम सातपुते यांनी पत्रात काय म्हटले?
“ताई जय श्रीराम. मी 2019 पासून सोलापूर जिल्ह्यातील माळशिरस विधानसभा मतदारसंघाचं प्रतिनिधित्व करतोय. मी आमदार झाल्यापासून ते आजतोवर मी माझ्या मतदारसंघातील जनतेच्या, आणि त्यायोगे सोलापूर जिल्ह्यातील जनतेच्या सेवेत माझ्या परीने प्रामाणिकपणे होईल तेवढी विकासकामे करण्याचा प्रयत्न केलाय. मी ज्या भारतीय जनता पक्षाचा कार्यकर्ता आहे, तिथे आम्ही समाजाला एकसंध ठेवण्यासाठी नरेंद्र मोदीच्या नेतृत्वात सबका साथ, सबका विकास, सबका विश्वास, सबका प्रयास या मंत्राला सार्थ ठरवत समाजातील शेवटच्या घटकाच्या कल्याणासाठी झटत आहोत. समाजात धर्म, जातीपातीत फूट पाडून कुणी एवढं वर्ष राजकारण केलंय, हे सोलापूरच्याच नव्हे तर पूर्ण देशाच्या जनतेनं आता चांगलंच ओळखलंय. राजकारणाची कुठलीही पार्श्वभूमी नसलेल्या एका ऊसतोड कामगाराच्या कुटूंबात जन्मलेल्या माझ्यासारख्या सामान्य कार्यकर्त्यावर भारतीय जनता पार्टीने जो विश्वास दाखवलाय, त्याला सोलापूरचा सर्वांगिण विकास करून सार्थ ठरवण्यासाठी मी नक्कीच प्रयत्नशील राहीन,” असे राम सातपुते यांनी या पत्रात म्हटले आहे.
