मोहोळ, 22 मेः मोहोळ-पंढरपूर महामार्गावर दोन चारचाकी कारची समोरासमोर जोरदार धडक झाली. हा अपघात इतका भीषण होता की, यात 6 जण जागीच ठार झाले आहेत. या अपघातात 4 जण जखमी झाले असून 2 जणांची प्रकृती चिंताजानक असल्याची प्राथमिक माहिती आहे. सदर अपघात आज सायंकाळी 5 च्या सुमारास झाला. या अपघातात मोहोळ शहरातील डॉक्टर दाम्पत्य, त्यांच्या नातेवाईकांसह दोन मुलांचा जागीच मृत्यू झाला आहे.
डॉ. आफरिन मुजाहिद अत्तार, डॉ. मुजाहिद अत्तार, मुलगा अरमान अत्तार, डॉ. आफरीन यांचे बंधू इरफान खान, त्यांच्या पत्नी बेनझीर इरफान खान, मुलगी अनाया इरफान खान या 6 जणांचा जागीच मृत्यू झाला आहे. तर स्कॉर्पिओ गाडीमधील राजेंद्र हुंडेकरी, रामचंद्र शेटे, मंदाकिनी शेटे हे सर्व जखमी झाले आहे.
दरम्यान, अत्तार आणि खान कुटुंबातील सदस्य त्यांच्या नातेवाईकांकडे गेले होते. मोहोळला आज परतताना पेनूर जवळच्या माळी पाटी जवळ पंढरपूरच्या दिशेने जाणाऱ्या स्कॉर्पिओ गाडीची त्यांच्या कारला जोरदार धडक झाली. हा अपघात इतका भीषण होता की खान यांच्या कारचा समोरील भाग अक्षरशः चक्काचूर झाला. अपघात पाहून स्थानिकांनी तात्काळ मदत करण्याचे प्रयत्न केले. पोलीसही घटनास्थळी तात्काळ दाखल झाले.
अपघातातील जखमींना सोलापुरात उपचारासाठी रवाना करण्यात आले. तर मृतांना मोहोळ शासकीय रुग्णालयात शवविच्छेदनासाठी हलविले आहे. घटनास्थळी बघ्यांची मोठी गर्दी जमली. यामुळे काही वेळासाठी महामार्गावरील वाहतूक विस्कळीत झाली होती. पोलिसांनी मोहोळ-पंढरपूर रस्त्यावरील अपघातग्रस्त वाहने व वाहतुकीला अडथळा करणारी वाहने रस्त्याच्या बाजूला काढून वाहतूक सुरळीत केली. दरम्यान, मोहोळ पोलीस याबाबत अधिक तपास करत आहेत.
