पुणे, 15 मेः यंदा अनुकूल परिस्थितीमुळे नैऋत्य मोसमी वारे अंदमान समुद्र, निकोबार बेटासंह बंगलाच्या उपसागरातील दक्षिणपूर्व भागात सोमवारी आगमन होण्याची शक्यता भारतीय हवामान विभागाने वर्तविले आहे. पुढील 24 तासांमध्ये मोसमी पाऊस अंदमानात दाखल होईल, असा अंदाजही भारतीय हवामान विभागाने वर्तविली आहे. दरम्यान, पुढील 2 दिवसांत केरळ किनारपट्टीवर मुसळधार पावसाचा अंदाज वर्तविला आहे.
भारतीय हवामान विभागाने वर्तविलेल्या अंदाजानुसार, मोसमी पावसाची प्रगती वेगाने होत आहे. मोसमी पाऊस 24 तासांत अंदमान आणि निकोबार बेटांवर दाखल होण्याचा अंदाज आहे. त्यामुळे येत्या 5 दिवसांत जोरदार वारे, विजांच्या कडकडाटासह मुसळधार पावसाचा अंदाज आहे. सध्या दक्षिण भारतात मुसळधार पाऊस पडत आहे. राज्यातील काही जिल्ह्यांमध्येही विजांच्या कडकडाटासह जोरदार पावसाचा अंदाज व्यक्त करण्यात आला आहे.
मान्सून अंदमानच्या दिशेने निघाल्याने दक्षिण भारतात मुसळधार पाऊस सुरू आहे. सध्या केरळमध्ये अतिवृष्टी सुरू आहे. आसाम, मेघालय आणि पश्चिम बंगालमध्येही जोरदार पावसाला सुरुवात झाल्याचे वृत्त आहे. उत्तर भारतात मात्र उष्णतेची लाट कायम आहे. उत्तर भारतात कमाल तापमानाचा पारा 45 ते 49 अंश सेल्सिअसवर पोहोचला आहे. गुजरात, मध्यप्रदेश आणि महाराष्ट्रातील विदर्भात तापमान 40 ते 44 अंश सेल्सिअसवर गेल्याची माहिती वेधशाळेकडून दिली आहे.
विषुववृत्तीय भागाकडून बंगालचा उपसागर आणि अंदमानाच्या समुद्राकडे जोरदार उष्ण प्रवाह वाहत आहेत. त्यामुळेच नैर्ऋत्य मोसमी वाऱ्यांचा प्रवास सरासरीच्या वेळेआधी 3 ते 4 दिवस झाला आहे. हवामान विभागाच्या अंदाजानुसार, बंगालचा उपसागर आणि अंदमान समुद्र आणि निकोबार नैर्ऋत्य मोसमी वारे 20 ते 22 मे च्या आसपास दाखल होत असतात. मात्र, अनुकूल स्थितीमुळे नैर्ऋत्य मोसमी वाऱ्यांचा प्रवास सुकर झाला आहे. अशीच स्थिती पुढील काही दिवस राहिली, तर केरळच्या किनारपट्टीवर देखील वेळेच्या आधी नैर्ऋत्य मोसमी वारे दाखल होण्याची चिन्हे आहेत.
राज्यातील कोल्हापूर, सांगली, सातारा, सोलापूर या मध्य महाराष्ट्रातील चार जिल्ह्यांसह परभणी, हिंगोली नांदेड, लातूर, उस्मानाबाद या नऊ जिल्ह्यांना 16 ते 19 मे पर्यंत चार दिवस विजांच्या कडकडाटासह मुसळधार पावसाचा इशारा (येलो ॲलर्ट) हवामान शास्त्र विभागाने दिला आहे. तसेच रायगड, रत्नागिरी, सिंधुदुर्ग, बीड या चार जिल्ह्यांत हलका ते मध्यम पाऊस होईल, अशी शक्यताही वर्तविण्यात आली आहे.
