नवी दिल्ली, 01 मे : (विश्वजीत खाटमोडे) एलपीजी गॅस सिलिंडरच्या किमतीबाबत महत्त्वाची बातमी आहे. देशातील तेल विपणन कंपन्यांनी आज 19 किलो वजनाच्या व्यावसायिक एलपीजी गॅस सिलिंडरच्या किमतीत 19 रुपयांची कपात केली आहे. जागतिक बाजारात तेलाच्या किमती घसरत असल्याच्या पार्श्वभूमीवर ही कपात करण्यात आली आहे. त्यामुळे सर्वसामान्य व्यावसायिकांना काहीसा दिलासा मिळाला आहे. तर दुसरीकडे मात्र घरगुती गॅस सिलिंडरच्या किमतीत कसलाही बदल झालेला नाही.
https://twitter.com/ANI/status/1785489658849440163?s=19
प्रमुख शहरांतील नवे दर
19 किलोंच्या व्यावसायिक गॅस सिलिंडरच्या किमतीत 19 रुपयांची कपात केल्यानंतर, दिल्लीत व्यावसायिक गॅसची किंमत 1764.50 रुपयांवरून 1745.50 रुपये झाली आहे. तर मुंबईत या सिलिंडरची किंमत 1717.50 रुपयांवरून 1698.50 रुपये झाली आहे. कोलकात्यात हा गॅस सिलिंडर आता 1879 ऐवजी 1859 रुपयांना मिळणार आहे. तसेच या दर कपातीमुळे चेन्नईत 19 किलोंच्या व्यावसायिक सिलिंडरची किंमत 1930 रुपयांवरून 1911 रुपये इतकी झाली आहे. हे नवे दर आजपासून लागू झाले आहेत.
घरगुती गॅसची किंमत जैसे थे!
दरम्यान, व्यावसायिक गॅस सिलिंडरच्या किमतीत घट झाली असली तरीही 14.2 किलो वजनाच्या घरगुती गॅस सिलिंडरच्या किमतीत कसलाही बदल झालेला नाही. केंद्र सरकारने यापूर्वी 8 मार्च 2024 रोजी घरगुती गॅस सिलिंडरच्या किंमतीत 100 रुपयांची कपात केली होती. तेंव्हापासून घरगुती गॅस सिलिंडर दिल्लीत 803 रुपयांना मिळत आहे. तर मुंबईत सध्या घरगुती गॅस सिलिंडरची किंमत 802.50 रुपये, कोलकातामध्ये 829 रुपये आणि चेन्नईमध्ये 818.50 रुपये इतकी झाली आहे.
