पुणे, 26 फेब्रुवारी: (विश्वजीत खाटमोडे) पुणे शहरातील स्वारगेट बस स्थानकात एका 26 वर्षीय तरूणीवर बलात्कार झाल्याची घटना घडली आहे. या घटनेमुळे एकच खळबळ उडाली आहे. काल (दि.25) पहाटेच्या सुमारास ही घटना घडली. या प्रकरणी स्वारगेट पोलीस ठाण्यात एका व्यक्तीच्या विरोधात गुन्हा दाखल झाला आहे. या प्रकरणातील आरोपीची ओळख पटली आहे. दत्तात्रय रामदास गाडे असे या आरोपीचे नाव आहे. हा आरोपी अद्याप फरार असून पकडण्यासाठी पोलिसांनी विशेष पथके तैनात केली आहेत.
https://x.com/ANI/status/1894683794508337615?t=yEQbQCVXDhgdPYGHQpRChA&s=19
अशी घडली घटना
पुणे शहर पोलीस उपायुक्त स्मार्तना पाटील यांनी दिलेल्या माहितीनुसार, पीडित तरूणी कामानिमित्त पुण्यात राहत असून ती आपल्या मूळ गावी सातारा तालुक्यातील फलटण येथे जाण्यासाठी स्वारगेट बसस्थानकात बसची वाट पाहत होती. त्याचवेळी आरोपीने पीडित तरूणीशी ओळख वाढवून तिला फसवून सांगितले की, ती ज्या गावाला जाणार आहे, त्या मार्गावरील बस दुसरीकडे पार्क करण्यात आली आहे. असे सांगून आरोपीने या तरूणीला डेपोत थांबलेल्या बसमध्ये नेले आणि तिथे तिच्यावर अत्याचार केला.
आरोपीच्या शोधासाठी पोलीस पथके तैनात
या घटनेनंतर पीडित तरूणीने पोलिसांकडे तक्रार दाखल केली. पोलिसांनी तत्काळ तपास सुरू करत आरोपीची ओळख पटवली आहे. मात्र, तो सध्या फरार असून त्याचा शोध घेण्यासाठी पोलीस पथके तैनात करण्यात आली आहेत. सुदैवाने पीडित महिलेची प्रकृती स्थिर असल्याची माहिती पोलिसांनी दिली आहे. आरोपीला लवकरात लवकर अटक करण्यासाठी पोलीस सर्वतोपरी प्रयत्न करत असून लवकरच तो गजाआड होईल, असा विश्वास पोलीस उपायुक्त स्मार्तना पाटील यांनी व्यक्त केला आहे.
