बारामती, 01 नोव्हेंबर: (बाळासाहेब बालगुडे) बारामती तालुक्यातील वडगाव निंबाळकर पोलीस स्टेशन हद्दीमध्ये राहणारे पोलीस दोन पोलीस अधिकारी कर्तव्यावर असताना मरण पावले होते. पोलीस अंमलदार संदीप पांडुरंग मोकाशी (होळ आटफाटा, ता. बारामती, जि. पुणे) आणि गणेश बाबासो भांडलकर (होल गीते वस्ती, ता. बारामती, जि. पुणे) अशी या पोलिसांची नावे आहेत. कर्तव्यावर असताना मरण पावलेल्या या दोन पोलिसांच्या कुटुंबीयांची पुणे ग्रामीणचे पोलीस अधीक्षक पंकज देशमुख यांनी सांत्वन पर भेट घेतली.
यावेळी पंकज देशमुख यांनी या शहीद पोलिसांच्या कुटुंबीयांना पुणे ग्रामीण पोलीस दलातर्फे दिवाळीनिमित्त खास भेट वस्तू, फटाके आणि मिठाईचा बॉक्स दिला. तसेच त्यांनी यावेळी शहीद पोलिसांच्या कुटुंबीयांना दिवाळीच्या शुभेच्छा दिल्या. यावेळी शहीद पोलिसांच्या कुटुंबीयांनी पुणे ग्रामीणचे पोलीस अधीक्षक पंकज देशमुख आणि पोलिसांचे आभार मानले आणि त्यांना दीपावलीच्या शुभेच्छा दिल्या. याप्रसंगी, वडगाव निंबाळकरचे सहाय्यक पोलीस निरीक्षक सचिन काळे आणि पोलीस अधिकारी उपस्थित होते.
