इंदापूर, 22 ऑक्टोंबर: (विश्वजीत खाटमोडे) पुणे जिल्हा परिषदेचे माजी सभापती आणि राष्ट्रवादी शरदचंद्र पवार पक्षाचे नेते प्रविण माने हे आगामी विधानसभा निवडणुकीसाठी इंदापूर मतदारसंघातून त्यांचा उमेदवारी अर्ज बुधवार, दि. 23 ऑक्टोंबर रोजी दाखल करणार आहेत, याची माहिती प्रविण माने यांच्या दिली आहे. दरम्यान, प्रविण माने हे इंदापूर मतदारसंघात अपक्ष उमेदवार म्हणून अर्ज भरणार आहेत. प्रविण माने उद्या (दि.23) सकाळी 10 वाजता विधानसभा निवडणुकीसाठी उमेदवारी अर्ज दाखल करणार आहेत. त्यावेळी प्रविण माने यांची इंदापूरातील श्रीराम चौक येथून रॅली काढण्यात येणार आहे. तसेच त्यांची यावेळी इंदापूर येथील मार्केट कमिटीच्या मैदानावर सभा पार पडणार आहे.
https://x.com/PravinManeSpeak/status/1848613807775797517?t=k0cwWrAJhMeJhMmm6JNKuw&s=19
नाराज असल्याची चर्चा
काही दिवसांपूर्वी माजी मंत्री हर्षवर्धन पाटील यांनी भाजपमधून राष्ट्रवादी काँग्रेस पार्टी शरदचंद्र पवार पक्षात जाहीर प्रवेश केला होता. त्यांच्या पक्ष प्रवेशामुळे प्रविण माने गेल्या काही दिवसांपासून नाराज असल्याची चर्चा होती. तसेच ते अपक्ष निवडणूक लढविणार असल्याचे म्हटले जात होते. या चर्चा आता खऱ्या ठरल्या आहेत. तत्पूर्वी, प्रविण माने यांनी 2024 च्या लोकसभा निवडणुकीवेळी सुनेत्रा पवार यांचा प्रचार केला होता. त्यानंतर त्यांनी पुन्हा एकदा राष्ट्रवादी काँग्रेस पार्टी शरदचंद्र पवार पक्षात प्रवेश केला होता. त्यामुळे प्रविण माने यांना राष्ट्रवादी शरदचंद्र पवार पक्षाकडून विधानसभा निवडणुकीसाठी इंदापूर मतदारसंघातून तिकीट मिळणार असल्याची शक्यता वर्तविण्यात येत होती. परंतु, हर्षवर्धन पाटील यांच्या पक्ष प्रवेशामुळे हे चित्र पालटले आहे.
इंदापूरात तिरंगी लढत
दुसरीकडे, इंदापूर मतदारसंघात अजित पवार यांच्या राष्ट्रवादी काँग्रेस पार्टीकडून आमदार दत्तात्रय भरणे यांची उमेदवारी निश्चित मानली जात आहे. तसेच नुकतेच भाजपमधून राष्ट्रवादी काँग्रेस पार्टी शरदचंद्र पवार पक्षात प्रवेश केलेले हर्षवर्धन पाटील यांना शरद पवार यांच्या राष्ट्रवादीकडून उमेदवारी मिळण्याची शक्यता आहे. तर प्रविण माने त्यांचा अपक्ष उमेदवार म्हणून अर्ज दाखल करणार आहेत. त्यामुळे यंदाच्या विधानसभा निवडणुकीत इंदापूर मतदारसंघात तिरंगी लढत होण्याची शक्यता आहे. दरम्यान, प्रविण माने यांची उमेदवारी निश्चित झाल्यास त्याचा फायदा कोणाला होणार? हे पाहणे महत्त्वाचे ठरणार आहे.
