फलटण, 17 फेब्रुवारी: (विश्वजीत खाटमोडे) फलटण तालुक्यातील पर्यटन विकासाला चालना देण्यासाठी तातडीने उपाययोजना करण्याची मागणी सामाजिक कार्यकर्त्या ॲड. कांचनकन्होजा खरात यांनी केली आहे. या संदर्भात त्यांनी फलटण उपविभागीय अधिकारी यांना निवेदन दिले आहे. यावेळी त्यांच्यासोबत सामाजिक कार्यकर्ते अमर खंदारे उपस्थित होते.
फलटण तालुक्यात तीन प्रमुख धबधबे असून, त्यातील दोन धुमाळवाडीत आहेत. धुमाळवाडी हे फळांचे गाव म्हणून ओळखले जाते. येथे पाचकुंड व नऊकुंड नावाचे मोठे धबधबे आहेत. तसेच, जावली गावाशेजारीही एक मोठा धबधबा आहे. मात्र, या ठिकाणी पूर्वी असलेले घनदाट जंगल आणि फळझाडे आता नष्ट होण्याच्या मार्गावर आहेत. त्या ठिकाणी काही वर्षांपासून काही शेतकऱ्यांनी जमिनी कसण्यास सुरुवात केली आहे. त्यामुळे धबधब्याला भेटी देणाऱ्या काही पर्यटकांकडून काही फळे तोडली जातात. त्यामुळे शेतकऱ्यांचे नुकसान होत आहे.
या पार्श्वभूमीवर, पर्यटन विभाग, वनविभाग आणि महाराष्ट्र सरकारने तातडीने या तिन्ही ठिकाणी लक्ष घालून, अतिक्रमण झाल्यास ते हटवावे आणि शेतकऱ्यांच्या फळझाडांना संरक्षण देऊन धुमाळवाडी व जावली गावातील धबधब्यांचा विकास करण्यात यावा, जेणेकरून गावकरी व पर्यटक यांच्यामध्ये भांडणे होणार नाहीत. पर्यटकांना वाहने व्यवस्थित लावता येतील व दोन्ही गावच्या नागरिकांना नवीन रोजगार निर्माण होईल. तसेच पर्यटकांचे संरक्षण होईल, होणारी गैरसोय दूर होईल, सर्वात महत्त्वाचे राज्यातून व देशातून या तिन्ही धबधब्यांना पाहण्यासाठी पर्यटक येथे येतील एवढे हे तिन्हीही धबधबे निसर्गाच्या कुशीत दडलेले आहेत. त्यांना पर्यटकांसाठी खुले करून राज्य पर्यटन स्थळ बनवण्यात यावे, अशी मागणी त्यांनी या निवेदनातून केली आहे.
तसेच धुमाळवाडी पासून काहीच अंतरावर वारुगड व संतोषगड आहेत. याही किल्ल्यांकडे जाणाऱ्या रस्त्यांचा वा किल्ल्यांच्या दुरुस्त्या केल्यास फलटण तालुक्यातील पर्यटन विकासाला चालना मिळेल. तसेच फलटण पासून काहीच अंतरावर निंभोरे गाव आहे. त्या ठिकाणी महामानव डॉ. बाबासाहेब आंबेडकर यांच्या अस्थिकलशाची स्थापना केलेली आहे. जागेची कमतरता असल्याने सरकारने या गावात दोन ते दहा एकर जागा संपादित करून त्या ठिकाणी डॉक्टर बाबासाहेब आंबेडकर यांचे भव्य स्मारक व प्रेरणाभूमी उभारण्यात यावी, अशी मागणी देखील करण्यात आली आहे.
फलटण हे महानुभव पंथीयांसाठी दक्षिण काशी म्हणून ओळखले जाते. येथे श्री. चक्रपाणी प्रभूंचे जन्मस्थान आहे. या मंदिरापासूनच जाणाऱ्या बालगंगा नदीवरील पुलाची उंची कमी आहे. याच पुलावरून श्री राम रथ व घोड्याची यात्रा जाते. पावसाळ्यात जास्त प्रमाणात पाऊस झाल्यास यात्रांचे मार्ग बदलावे लागतात. त्यामुळे या पुलाची उंची पाच ते सहा फूट वाढवावी आणि परिसरातील कचऱ्याचे व्यवस्थापन करावे, अशीही मागणी करण्यात आली आहे.
फलटण-कोरेगाव क्षेत्रात आणि राष्ट्रीय महामार्गांवर ठिकठिकाणी सुलभ शौचालये उभारावी. तसेच राज्य व राष्ट्रीय महामार्गावर अलटून पालटून चार ते आठ किलोमीटर वर सुलभ शौचालय उभारून देशासाठी पायलेट प्रोजेक्ट निर्माण करावा. यासाठी राष्ट्रीय महामार्ग प्राधिकरणाने मंजुरी दिली असली, तरी ती 40 किलोमीटरच्या अंतरावर आहे. हे शौचालये 4 ते 8 किलोमीटरच्या अंतरावर बांधून देशासमोर आदर्श ठेवावा, असे ॲड. खरात यांनी सांगितले.
याशिवाय, फलटणमधून जाणाऱ्या बानगंगा नदीचे रुपांतर गटारगंगेत झाले आहे. या नदीची स्वच्छता करून, तिला सुरक्षा भिंती आणि बंधारे बांधावेत तसेच, धरणाचे स्वच्छ पाणी सोडून पर्यटकांसाठी बोटिंग सुविधा सुरू करावी. नदीच्या काठावर नागरिकांसाठी चौपाटी आणि खाऊ गल्ली तयार करण्यात यावी. या सर्व उपाययोजना तातडीने केल्यास फलटण तालुका पर्यटनाच्या नकाशावर महत्त्वाचे स्थान मिळवेल आणि स्थानिक रोजगारनिर्मिती होईल. यासाठी शासनाने तातडीने पावले उचलावीत, अशी मागणी ॲड. कांचनकन्होजा खरात यांनी केली आहे.
