मुंबई, 06 जून: (विश्वजीत खाटमोडे) मुंबईतील माहिम परिसरात एक दुर्घटना घडली आहे. मुंबईतील माहीम परिसरात मोकळ्या इमारतीचा स्लॅब कोसळल्याची घटना घडली आहे. या दुर्घटनेत एका 35 वर्षीय महिलेचा मृत्यू झाला, तर दुसरी महिला जखमी झाली आहे. ही घटना बुधवारी सायंकाळच्या सुमारास घडली. माहिम परिसरातील बॉम्बे स्कॉटिश शाळेजवळील दिलीप गुप्ते मार्गावरील एका मजली मोकळ्या इमारतीच्या पहिल्या मजल्याचा मोठा स्लॅब काल सायंकाळी अचानकपणे कोसळला. सदर इमारत मोकळी असल्याने, ही इमारत पाडण्याचे काम सुरू होते. त्यावेळी ही दुर्घटना घडली. दरम्यान, या दोन्ही महिला मजूर असल्याची माहिती समोर आली आहे.
https://twitter.com/ANI/status/1798421524434817061?s=19
स्लॅब पडल्याने दुर्घटना घडली
हे काम सुरू असताना या इमारतीचा स्लॅब अचानकपणे खाली कोसळला. या दुर्घटनेत दोन महिला मजूर या स्लॅबखाली अडकल्या. त्यावेळी स्थानिक लोक आणि अग्निशमन दलाच्या जवानांनी या ढिगाऱ्याखाली सापडलेल्या दोन्ही महिलांना मुंबईतील हिंदुजा रुग्णालयात उपचारासाठी दाखल केले. त्यातील एका महिलेचा जीव वाचला, तर या दुर्घटनेत एका 35 वर्षीय महिला मजुराचा मृत्यू झाला आहे.
जखमी महिलेची प्रकृती स्थिर
दरम्यान, या घटनेत जखमी असलेल्या महिलेच्या छातीवर स्लॅबचा काही भाग कोसळला होता. त्यावेळी अग्निशमन दलाच्या जवानांनी या महिलेला सुरक्षितपणे बाहेर काढले. त्यानंतर त्यांनी या महिलेला सुरूवातीला हिंदुजा रुग्णालयात दाखल केले होते. मात्र नंतर या महिलेला सायन रुग्णालयात हलविण्यात आले. सध्या या महिलेची प्रकृती स्थिर असल्याची माहिती रुग्णालयाच्या डॉक्टरांनी दिली आहे.
