दिल्ली, 18 डिसेंबर: (विश्वजीत खाटमोडे) राष्ट्रीय तपास संस्थेने (एनआयए) गेल्या काही दिवसांपासून देशभरात अनेक ठिकाणी छापे टाकून दहशतवादाच्या विरोधात कारवाई केली आहे. एनआयएने आज चार राज्यांमधील 19 ठिकाणी छापे टाकले. या कारवाईत त्यांनी बंदी घातलेल्या दहशतवादी संघटनेच्या बल्लारी मॉड्यूलच्या 8 कार्यकर्त्यांना अटक केली. यामध्ये त्यांच्या नेता मिनाझचा समावेश आहे. यावेळी एनआयएच्या पथकांनी कर्नाटकातील बल्लारी आणि बेंगळुरू, महाराष्ट्रातील अमरावती, मुंबई आणि पुणे, झारखंडमधील जमशेदपूर आणि बोकारो तसेच दिल्लीमध्ये छापे टाकले. ही कारवाई आज पहाटेच्या सुमारास केली.
https://twitter.com/NIA_India/status/1736714017560002737?s=19
एनआयएने अशा प्रकारे आरोपींचा दहशतवादी कारवायांचा डाव हाणून पाडला. तसेच या हे दहशतवादी देशात आयईडी स्फोट करण्याचा कट रचत असल्याची धक्कादायक बाब एनआयएच्या तपासात समोर आली आहे. याशिवाय छाप्यांदरम्यान अटक करण्यात आलेले 8 आयसिस एजंट हे प्रतिबंधित संघटना आयसिसच्या दहशतवाद आणि दहशत-संबंधित कृत्यांना सक्रियपणे प्रोत्साहन देण्यात गुंतले होते. ते सर्वजण मिनाज उर्फ मो. सुलेमान यांच्या नेतृत्वाखाली ते कार्यरत होते. अशी माहिती एनआयएने दिली आहे.
https://x.com/ANI/status/1736702255804698902?s=20
यावेळी त्यांनी मिनाज उर्फ मो. सुलेमान आणि सय्यद समीर यांना बल्लारी येथून, अनस इकबाल शेख याला मुंबईमधून, मोहम्मद मुनिरुद्दीन, सय्यद समिउल्ला उर्फ सामी यांना बेंगळुरूमधून, शायन रहमान उर्फ हुसेन याला दिल्लीतून आणि मोहम्मद शाहबाज आणि झुल्फिकार उर्फ गुड्डू यांना जमशेदपूरमधून अटक केली आहे.
राष्ट्रीय तपास संस्थेने या छाप्यांदरम्यान घटनास्थळावरून सल्फर, पोटॅशियम नायट्रेट, चारकोल, गनपावडर, साखर आणि इथेनॉल यांसारखा स्फोटक कच्चा माल, धारदार शस्त्रे, बेहिशेबी रोकड आणि गुन्हेगारी कागदपत्रे, स्मार्टफोन आणि इतर डिजिटल उपकरणे जप्त केली आहे. प्राथमिक तपासानुसार, आरोपींनी स्फोटक कच्चा माल आयईडी तयार करण्यासाठी वापरण्याची योजना आखली होती, ज्याचा वापर दहशतवादी कृत्ये करण्यासाठी केला जाणार होता. तसेच हे आरोपी आयसिस या दहशतवादी संघटनेच्या हिंसक जिहाद, खिलाफत, इत्यादी मार्गाचा अवलंब करून ते एनक्रिप्टेड ॲप्सच्या माध्यमातून सतत एकमेकांच्या संपर्कात होते, असे तपासात पुढे आले आहे. ते विशेषत: भरतीच्या उद्देशाने महाविद्यालयीन विद्यार्थ्यांना लक्ष्य करत होते आणि जिहादच्या उद्देशाने मुजाहिदीनच्या भरतीशी संबंधित कागदपत्रे देखील प्रसारित करत होते.
https://twitter.com/ANI/status/1736702217250636196?s=19
इस्लामिक स्टेट ऑफ इराक अँड सीरिया (आयसिस) या दहशतवादी संघटनेच्या भारताविरुद्धच्या दहशतवादविरोधी कटाचा नाश करण्याच्या एनआयएच्या प्रयत्नांचा एक भाग म्हणून आज टाकण्यात आलेले छापे होते. त्यांनी कर्नाटक पोलीस, महाराष्ट्र पोलीस, झारखंड पोलीस आणि दिल्ली पोलीस यांच्या मदतीने या ठिकाणांचा शोध घेतला. एनआयएने 14 डिसेंबर 2023 रोजी आयसिस या दहशतवादी संघटनेने प्रेरित बल्लारी मॉड्युल विरुद्ध गुन्हा दाखल केला होता. तेव्हापासून ते या मॉड्यूलच्या सदस्यांचा मागोवा घेण्यासाठी आणि त्यांना पकडण्यासाठी राज्य पोलिस आणि केंद्रीय एजन्सी सोबत काम करत आहे. त्यामुळे एनआयए सध्या दहशतवादविरोधी मोठ्या प्रमाणावर कारवाई करत आहे. अलीकडच्या काही महिन्यांत त्यांनी विविध आयसिस मॉड्यूल्सचा भंडाफोड केला आहे. एनआयएने या छाप्यांमध्ये अनेक दहशतवाद्यांना अटक केली आहे. याची माहिती राष्ट्रीय तपास संस्थेने (एनआयए) एक निवेदन प्रसिद्ध करून दिली आहे.
