पुणे, 27 मार्च: (विश्वजीत खाटमोडे) पुणे शहरातील कोथरूड परिसरात मोटरसायकल चोरी करणाऱ्या दोन आरोपींना पोलिसांनी अटक केली आहे. आकाश सुरेश वाघिरे (वय 21, रा. शिवाजीनगर, पुणे) आणि आदित्य भारत जाधव (वय 21, रा. चंदननगर, खराडी, पुणे) अशी अटक केलेल्यांची नावे आहेत. त्यावेळी पोलिसांनी त्यांच्याकडून 84 हजार रुपये रुपये किमतीच्या तीन मोटरसायकली जप्त केल्या आहेत. याची माहिती पुणे शहर पोलिसांनी प्रसिद्धी पत्रकाद्वारे दिली आहे.
काय घडले?
कोथरूड परिसरातील गोपीनाथ नगर येथून एका नागरिकाची मोपेड बाईक चोरी झाली होती. याबाबत कोथरूड पोलीस ठाण्यात अज्ञात व्यक्तींच्या विरोधात भारतीय न्याय संहितेच्या कलम 303 (2) अंतर्गत गुन्हा नोंद करण्यात आला होता. त्यानुसार, या प्रकरणाच्या तपासासाठी वरिष्ठ पोलीस निरीक्षक संदीप देशमाने यांनी शास्त्रीनगर पोलीस चौकीच्या अधिकाऱ्यांना सूचना दिल्या होत्या.
गुप्त माहितीच्या आधारे कारवाई
यादरम्यान, पोलीस उपनिरीक्षक मोहन चव्हाण व त्यांचे पथक कोथरूड पोलीस ठाण्याच्या हद्दीत गस्त घालत असताना अंमलदार योगेश सुळ यांना माहिती मिळाली की, कोथरूड परिसरातील गोपीनाथ नगर येथील मेघसृष्टी भागात दोन अनोळखी इसम नंबर प्लेट नसलेल्या काळ्या रंगाच्या अ‍ॅक्टिव्हा स्कूटरवर संशयास्पदरीत्या फिरत आहेत. या गोपनीय माहितीच्या आधारे पोलिसांनी घटनास्थळी जाऊन त्या दोघांना ताब्यात घेतले. चौकशीत त्यांनी आपली नावे आकाश वाघिरे आणि आदित्य जाधव अशी सांगितली.
तीन मोटरसायकल जप्त
पोलिसांनी वाहनाच्या मालकीबाबत विचारणा केली असता, आरोपींनी उडवाउडवीची उत्तरे दिली. पोलिसांनी अधिक चौकशी केल्यावर त्यांनी भारती विद्यापीठ परिसरातून स्कूटर चोरल्याची कबुली दिली. तसेच, त्यांनी आणखी दोन मोटरसायकल चोरी केल्याचेही मान्य केले. या आरोपींकडून पोलिसांनी तीन चोरीच्या मोटरसायकली जप्त केल्या आहेत. त्यांची किंमत 84 हजार रुपये असल्याचे पोलिसांनी सांगितले.
चोरीच्या गुन्ह्यांची उकल
पोलिसांनी या आरोपींना अटक केली असून सध्या त्यांची कसून चौकशी सुरू आहे. दरम्यान, या प्रकरणात कोथरूड, लोणी काळभोर आणि भारती विद्यापीठ पोलीस ठाण्यांत दाखल असलेल्या मोटरसायकल चोरीच्या तीन गुन्ह्यांची उकल करण्यात कोथरूड पोलिसांना यश आले आहे. या आरोपींच्या विरोधात त्या पोलीस ठाण्यात गुन्हे दाखल आहेत.
पोलिसांची यशस्वी कारवाई
ही कारवाई अपर पोलीस आयुक्त प्रविणकुमार पाटील, पोलीस उपआयुक्त संभाजी कदम, सहायक पोलीस आयुक्त भाऊसाहेब पठारे यांच्या मार्गदर्शनाखाली कोथरूड पोलीस ठाण्याचे वरिष्ठ पोलीस निरीक्षक संदीप देशमाने, सहायक पोलीस निरीक्षक रविंद्र आळेकर, पोलीस उपनिरीक्षक मोहन चव्हाण, बसवराज माळी, तसेच पोलीस अंमलदार योगेश सुळ व हनुमंत माळी यांच्या पथकाने केली.
