लोणावळा, 01 जुलै: (विश्वजीत खाटमोडे) पुण्यातील लोणावळा परिसरातील भुशी धरणाच्या मागील टेकडीवर असलेल्या धबधब्यात 5 जण बुडाले असल्याची घटना घडली होती. यामध्ये एक महिला आणि 4 मुलांचा समावेश आहे. ही दुर्घटना काल (दि. 30 जून) दुपारी तीनच्या सुमारास घडली होती. या दुर्घटनेत आतापर्यंत 4 जणांचे मृतदेह सापडले असून, एकजण अजून बेपत्ता आहे. त्याचा सध्या शोध घेतला जात आहे. दरम्यान, ही घटना घडल्यानंतर पोलीस आणि बचाव पथक घटनास्थळी दाखल झाले. त्यानंतर त्यांनी याठिकाणी बचावकार्य सुरू केले. काल रात्री 7.30 वाजेपर्यंत त्यांचे हे बचावकार्य सुरू होते.
https://x.com/ANI/status/1807648713755574694?s=19
https://x.com/ANI/status/1807695017105891687?s=19
जिल्हाधिकाऱ्यांची घटनास्थळाला भेट
दरम्यान, पुणे जिल्हाधिकारी सुहास दिवसे यांनी आज घटनास्थळाला भेट दिली. “आम्ही सकाळी 8 वाजता पुन्हा बचावकार्य सुरू केले. नौदलाचे जवान तसेच शिवदुर्ग रेस्क्यू पथक आता मृतदेह बाहेर काढण्यासाठी सर्वतोपरी प्रयत्न करत आहेत. आतापर्यंत चौघांचे मृतदेह सापडले असून, एकजण अजून बेपत्ता आहे. त्याचा सध्या शोध सुरू आहे. पण जोरदार पाऊस पडत असल्याने नदीच्या पाण्याची पातळी वाढत आहे. तसेच याठिकाणी खूप जास्त वारा आहे. त्यामुळे रेस्क्यू ऑपरेशन करताना अडथळे येत आहेत.” असे जिल्हाधिकारी सुहास दिवसे यांनी यावेळी सांगितले.
भुशी धरण ओव्हर फ्लो!
भुशी धरणाच्या मागील डोंगरावर असलेल्या एका धबधब्यात बुडालेले 5 जण एकाच कुटुंबातील आहेत. ते सर्वजण या धबधब्यावर पर्यटनासाठी आले होते. मात्र, पाण्याच्या प्रवाहात ते सर्वजण वाहून गेले. हे बुडालेले पाचही जण पुणे शहरातील सय्यद नगर येथील अन्सारी कुटुंबातील आहेत. दरम्यान, या दुर्घटनेमुळे सर्वत्र हळहळ व्यक्त केली जात आहे. तर या दुर्घटनेमुळे पर्यटनाला जाताना स्वतःची काळजी घेण्याचे आवाहन करण्यात आले आहे. दरम्यान लोणावळा परिसरात सध्या पावसाचे वातावरण आहे. गेल्या काही दिवसांपासून लोणावळ्यात मुसळधार पाऊस पडत असल्याने परिसरातील भुशी धरण पूर्णपणे भरले आहे. त्यामुळे भुशी धरणाला भेट देण्यासाठी सध्या हजारोंच्या संख्येने पर्यटक लोणावळ्याच्या दिशेने जाताना दिसत आहेत. तर काल सुट्टीचा दिवस असल्यामुळे भुशी धरण येथे पर्यटकांची मोठ्या प्रमाणात गर्दी झाली होती.
