लोकसभा निवडणूक; चौथ्या टप्प्यातील मतदानाला सुरूवात! या पाहा कोणत्या जागेवर कशी लढत?

पुणे, 13 मे: (विश्वजीत खाटमोडे) महाराष्ट्रात आज लोकसभा निवडणुकीच्या चौथ्या टप्प्यासाठी मतदान होत आहे. चौथ्या टप्प्यात राज्यातील 11 मतदारसंघात आज सकाळी 7 वाजल्यापासून मतदान सुरू झाले आहे. यामध्ये नंदूरबार, जळगाव, रावेर, जालना, औरंगाबाद, मावळ, पुणे, शिरूर, अहमदनगर, शिर्डी आणि बीड या जागांचा समावेश आहे. या निवडणुकीत अनेक दिग्गज उमेदवारांची प्रतिष्ठा पणाला लागली आहे. त्यामुळे चौथ्या टप्प्यातील मतदानाकडे सर्वांचे लक्ष लागले आहे.

https://twitter.com/Info_Pune/status/1789652341076934689?s=19

शिरूरच्या जागेची चर्चा

चौथ्या टप्प्यातील निवडणुकीमध्ये शिरूर लोकसभा मतदारसंघ सर्वाधिक चर्चेत आहे. या मतदारसंघात पवार विरुद्ध पवार असा संघर्ष पाहायला मिळत आहे. शिरूरमध्ये राष्ट्रवादी काँग्रेस पार्टी – शरदचंद्र पवार पक्षाचे अमोल कोल्हे आणि अजित पवारांच्या राष्ट्रवादीचे शिवाजीराव आढळराव पाटील यांच्यात लढत आहे. तसेच पुणे लोकसभा मतदारसंघात यंदा तिरंगी लढत होत आहे. यामध्ये भाजपचे मुरलीधर मोहोळ, काँग्रेसचे रविंद्र धंगेकर आणि वंचित बहुजन आघाडीचे वसंत मोरे यांच्यात सामना आहे. याशिवाय अहमदनगर लोकसभा मतदारसंघाकडे देखील राजकीय वर्तुळाचे लक्ष आहे. अहमदनगरमध्ये भाजपचे सुजय विखे पाटील विरुद्ध राष्ट्रवादी काँग्रेस पार्टी – शरदचंद्र पवार पक्षाचे निलेश लंके यांच्यात लढत होणार आहे.

मावळमध्ये ठाकरे गट विरुद्ध शिंदे गट

मावळ लोकसभा मतदारसंघात यंदा शिवसेनेचे शिंदे गट आणि ठाकरे गट आमने सामने आले आहेत. मावळमध्ये एकनाथ शिंदे यांच्या शिवसेनेचे श्रीरंग बारणे आणि शिवसेना उद्धव बाळासाहेब ठाकरे पक्षाचे संजोग वाघेरे यांच्यात लढत होणार आहे. तसेच छत्रपती संभाजीनगर लोकसभा मतदारसंघात यंदा तिरंगी लढत आहे. यामध्ये शिवसेनेचे संदिपान भुमरे, शिवसेना उद्धव बाळासाहेब ठाकरे पक्षाचे चंद्रकांत खैरे आणि एआयएमआयएम चे इम्तियाज जलील हे निवडणुकीच्या रिंगणात उभे आहेत. याशिवाय बीडमध्ये भाजपच्या पंकजा मुंडे विरुद्ध राष्ट्रवादी काँग्रेस पार्टी – शरदचंद्र पवार पक्षाचे बजरंग सोनावणे, नंदुरबारमध्ये भाजपच्या हिना गावित विरुद्ध काँग्रेसचे गोवल पाडवी, जालनामध्ये भाजपचे रावसाहेब दानवे विरुद्ध काँग्रेसचे कल्याण काळे, रावेरमध्ये भाजपच्या रक्षा खडसे विरुद्ध राष्ट्रवादी काँग्रेस पार्टी – शरदचंद्र पवार पक्षाचे श्रीराम पाटील, तर शिर्डीमध्ये शिवसेनेचे सदाशिव लोखंडे, शिवसेना उद्धव बाळासाहेब ठाकरे पक्षाचे भाऊसाहेब वाकचौरे आणि वंचित बहुजन आघाडीच्या उत्कर्षा रुपवते यांच्यात लढत आहे. जळगावमध्ये भाजपच्या स्मिता वाघ विरूद्ध शिवसेना उद्धव बाळासाहेब ठाकरे पक्षाचे करण पवार यांच्यात सामना रंगणार आहे. त्यामुळे या लढतींकडे सर्वांचे लक्ष लागले आहे.