पुणे, 24 जुलै: (विश्वजीत खाटमोडे) पुणेकरांसाठी आनंदाची बातमी आहे. पुणे शहराला पाणीपुरवठा करणाऱ्या धरणांपैकी एक असलेले खडकवासला धरण 98.37 टक्के भरले आहे. त्यामुळे खडकवासला धरणातून आज सकाळी 7 वाजल्यापासून नदीपात्रात 9 हजार 416 क्यूसेक पाण्याचा विसर्ग सुरू करण्यात येत आहे. त्यामुळे नदीकाठच्या गावातील नागरिकांनी खबरदारी घ्यावी, असे आवाहन खडकवासला पाटबंधारे विभागाच्या कार्यकारी अभियंत्यांनी केली आहे.
https://x.com/Info_Pune/status/1815923284539519354?s=19
नदीपात्रात 9,416 क्यूसेकने विसर्ग सुरू
दरम्यान, पुणे शहराला खडकवासला, पानशेत, वरसगाव आणि टेमघर या 4 धरणातून पाणीपुरवठा केला जातो. गेल्या काही दिवसांपासून या चारही धरणक्षेत्रात सातत्याने जोरदार पाऊस पडत आहे. त्यामुळे या चारही धरणांच्या पाणीसाठ्यात सध्या मोठ्या प्रमाणात वाढ होताना दिसत आहे. बुधवारी (दि. 24 जुलै) सकाळी 6 वाजेपर्यंत खडकवासला धरण 98.37 टक्के भरले होते. त्यामुळे सकाळी 7 वाजल्यापासून खडकवासला धरणातून मुठा नदीपात्रात 9 हजार 416 क्यूसेकने पाण्याचा विसर्ग केला जात आहे.
कोणत्या धरणात किती टक्के पाणीसाठा
तसेच पुणे शहराला पाणीपुरवठा करणाऱ्या पानशेत धरणात आज सकाळी 7 वाजेपर्यंत 68.60 टक्के इतका पाणीसाठा जमा झाला आहे. त्याचबरोबर आज सकाळी 6 वाजेपर्यंत वरसगाव धरण 53.77 टक्के भरले आहे. तर टेमघर धरणात आज सकाळी 7.45 वाजेपर्यंत 49.56 टक्के इतका पाणीसाठा जमा झाला आहे. याची माहिती राज्याच्या पाटबंधारे विभागाने दिली आहे. तत्पूर्वी, गेल्या वर्षी याच दिवशी खडकवासला धरणात 53.66 टक्के इतका पाणीसाठा होता. तर पानशेत 2.98 टक्के, वरसगाव 3.37 टक्के आणि टेमघर धरणात 38.93 टक्के इतका पाणीसाठा उपलब्ध होता.
