बारामती, 23 सप्टेंबरः बारामती येथील रयत शिक्षण संस्थेच्या श्री छत्रपती शाहू हायस्कूल व ज्युनिअर कॉलेज येथे पद्मभूषण डॉ. कर्मवीर भाऊराव पाटील यांची 135 वी जयंती गुरुवारी, 22 सप्टेंबर 2022 रोजी मोठ्या उत्साहात साजरी करण्यात आली. रयत शिक्षण संस्थेचे जनरल बॉडी सदस्य व समन्वय समिती सदस्य सदाशिव सातव यांच्या मार्गदर्शनाखाली डॉ. कर्मवीर भाऊराव पाटील यांची चित्ररथाची आकर्षक सजावट करण्यात आली. तसेच विद्यार्थ्यांनी वेगवेगळ्या राष्ट्र पुरुषांची वेशभूषा परिधान करून आकर्षक मिरवणूक बारामती शहरातून लेझीम ढोल ताशा झांज पथकासह काढली.
रामदास कदम यांच्या वक्तव्याचा बारामतीत निषेध
दरम्यान, छत्रपती शाहू हायस्कूलमध्ये पद्मभूषण डॉ. कर्मवीर भाऊराव पाटील यांच्या पुतळ्याचे मान्यवरांच्या हस्ते पूजन केले. तसेच लक्ष्मीबाई भाऊराव पाटील आणि डॉ. कर्मवीर भाऊराव पाटील यांच्या प्रतिमेचेही पूजन करून कर्मवीरांच्या रथाची मिरवणुकीस प्रारंभ झाला.
याप्रसंगी सदाशिव सातव, प्राचार्य डॉ. चंद्रशेखर मुरूमकर, दिलीप ढवाण पाटील, बी. एन. पवार सर, पी एन. तरंगे सर, पोपट मोरे सर, सय्यद सर, बी. ए. सुतार सर, डॉ. आगवणे सर, डॉ. माळी मॅडम, डॉ. गोसावी मॅडम आदी मान्यवर उपस्थित होते.
यावेळी शाहू शाळेत विज्ञान प्रदर्शनाचे आयोजन केले होते. तसेच माझी वसुंधरा, कचरा व्यवस्थापन, परिसर स्वच्छता याविषयी रांगोळी प्रदर्शन तृप्ती कांबळे, सुनीता कोकरे, अलका चौधर, सारिका गवळी, प्रीती चव्हाण, प्रियांका कदम यांनी नियोजन केले होते.
तसेच रयत शिक्षण संस्थेच्या पश्चिम विभागामार्फत आदर्श विज्ञान शिक्षक पुरस्कार मिळालेल्या तृप्ती कांबळे यांचा सत्कार सदाशिव सातव यांच्या हस्ते करण्यात आला. डॉ. कर्मवीर भाऊराव पाटील जयंतीनिमित्त पत्रकार अमोल यादव, सूरज देवकाते, योगेश नालंदे, अमित बगाडे, राजू कांबळे, संतोष जाधव यांचाही सत्कार शाळेच्या वतीने मान्यवरांच्या हस्ते केला. पद्मभूषण डॉ. कर्मवीर भाऊराव पाटील यांच्या 135व्या जयंतीनिमित्त आर. एन. आगरवाल टेक्निकल हायस्कूल, धो. आ. सातव हायस्कूल, टी. सी. कॉलेज, शाहू हायस्कूल येथील सर्व विद्यार्थी विद्यार्थिनी शिक्षक-शिक्षकेत्तर सेवकवृंद या सर्वांनी मिरवणुकीत सहभाग घेतला होता. कार्यक्रमाचे सूत्रसंचालन पर्यवेक्षक बी. ए. सुतार सरांनी केले तर आभार सुजित जाधव सरांनी मानले.
