मुंबई, 27 जानेवारीः (विश्वजीत खाटमोडे) मराठा आरक्षणाच्या मागणीसाठी मनोज जरांगे पाटील हे सध्या लाखो आंदोलकांसोबत मुंबईमध्ये आहेत. या आंदोलकांचा मुक्काम सध्या नवी मुंबईतील मुंबई कृषी उत्पन्न बाजार समिती मध्ये आहे. त्यामुळे विक्रीसाठी आणणाऱ्या शेतकऱ्यांची गैरसोय होऊ नये. तसेच सर्वसामान्य नागरिकांना अत्यावश्यक वस्तू मिळाव्यात, यासाठी राज्य सरकारने महत्त्वाचा निर्णय घेतला आहे. मुंबई महानगर विकास प्राधिकरणाच्या आयुक्तांनी अटल सेतुवरील शेतमालाच्या सुरळीत वाहतुकीबाबत संबंधितांना सुचना द्याव्यात, असे निर्देश राज्य सरकारने दिले आहेत. त्यामुळे शेतकऱ्यांना आपला शेतमाल अटल सेतू मार्गे मुंबईत विविध भाजी मंडईत विक्रीसाठी आणता येणार आहे. या संदर्भातील परिपत्रक राज्य सरकारने जारी केले आहे.
परिस्थिती पूर्वपदावर येईपर्यंत पर्यायी व्यवस्था करणे गरजेेचे!
मराठा आरक्षणाच्या मागणी साठी निघालेले आंदोलक मुंबई परिसरात आलेले आहेत. आंदोलक नवी मुंबईतील मुंबई कृषी उत्पन्न बाजार समिती येथे सद्यसस्थितीत मुक्कामी आहेत. यामुळे मुंबई कृषी उत्पन्न बाजार समितीत येणाऱ्या शेतमालाची व इतर खाद्य पदार्थाची आवक व पर्यायाने व्यवहार प्रभावित होण्याची शक्यता आहे. परिणामी, नवी मुंबई कृषी उत्पन्न बाजार समितीत आपला शेतमाल विक्रीसाठी आणणा-या शेतकऱ्यांची गैरसोय होऊ नये. तसेच बृहन्मुंबई महानगरपालिका हद्द व ठाणे महानगरपालिका हद्द व इतर जोडून असणाऱ्या महानगरपालिका क्षेत्रातील ग्राहकांना भाजीपाला व इतर दैनंदिन खाद्यपदार्थांचा संभाव्य तुटवडा टाळण्याकरीता परिस्थिती पूर्वपदावर येईपर्यंत पर्यायी व्यवस्था करणे आवश्यक असल्याचे या परिपत्रकात म्हटले आहे.
ग्राहकांपर्यंत उपरोक्त शेतीमाल पोहण्याचे संबंधितांना निर्देश
राज्यातील शेतकऱ्यांच्या नाशवंत शेतमालाचे वेळेत वितरण करण्यासाठी व शेतकऱ्यांचे आर्थिक नुकसान टाळण्यासाठी तसेच वरील नमुद केलेल्या महानगरपालिका हद्दीतील ग्राहकांना दैनंदिन भाजीपाला, फळे व इतर सर्व खाद्य पदार्थ उपलब्ध करुन देण्यासाठी संचालक, पणन, कार्यकारी संचालक, महाराष्ट्र राज्य, कृषी पणन मंडळ, पुणे व सचिव, मुंबई कृषी उत्पन्न बाजार समिती यांनी आपसात समन्वय साधुन आयुक्त, बृहन्मुंबई महानगरपालिका व इतर सर्व संबंधित महानगरपालिका यांच्यासोबत संपर्क करुन ग्राहकांपर्यंत उपरोक्त शेतीमाल पोहण्याबाबतची दक्षता घ्यावी. असे सरकारने म्हटले आहे. पाहा शासकीय निर्णय
शेतमालाची अटल सेतू मार्गे वाहतूक
राज्यातील पुणे मार्गे मुंबई कृषी उत्पन्न बाजार समितीत दाखल होणारा शेतमाल थेटपणे पनवेलनंतर मुंबई ट्रान्स हार्बर लिंक मार्गे (अटल सेतु) बृहन्मुंबई महानगरपालिका हद्दीत शेतकऱ्यांनी, व्यापा-यांनी व माल वाहतुकदारांनी मुंबई शहरातील दैनंदिन वाहतुकीस बाधा पोहचणार नाही अशा पद्धतीने तसेच छोट्या मंडईतील किरकोळ व्यापाऱ्यांना आणि ग्राहकांना विक्री करावा. पोलिस महासंचालक आणि आयुक्त, बृहन्मुंबई महानगरपालिका व इतर उल्लेखित महानगरपालिका आयुक्त यांनी महानगरपालिका क्षेत्रातील क्षेत्रीय अधिकारी व कर्मचारी यांना शेतमालाच्या वितरणामध्ये प्रतिबंध न करता सुलभता आणण्याबाबत सुचना द्याव्यात. तसेच आयुक्त, मुंबई महानगर विकास प्राधिकरण यांनी अटल सेतुवरील शेतमालाच्या सुरळीत वाहतुकीबाबत संबंधितांना सुचना द्याव्यात, असे निर्देश राज्य सरकारने या परिपत्रकातून दिले आहे.
