मुंबई, 14 फेब्रुवारी: (विश्वजीत खाटमोडे) राज्य मंत्रिमंडळाची आज एक महत्वपूर्ण बैठक आयोजित करण्यात आली होती. मुख्यमंत्री एकनाथ शिंदे यांच्या अध्यक्षतेखाली मंत्रालयात ही बैठक पार पडली. मंत्रिमंडळाच्या या बैठकीला उपमुख्यमंत्री देवेंद्र फडणवीस, उपमुख्यमंत्री अजित पवार आणि मंत्रिमंडळातील विविध विभागांचे मंत्री उपस्थित होते. या बैठकीत शासकीय वैद्यकीय महाविद्यालयातील इंटर्नशिप विद्यार्थ्यांच्या विद्यावेतनात भरीव वाढ करण्याचा मोठा निर्णय राज्य सरकारने घेतला आहे. त्यानुसार, आता या विद्यार्थ्यांना आता दरमहा 18 हजार रुपये मिळणार आहेत. सोबतच या बैठकीत अनेक महत्वपूर्ण निर्णय घेण्यात आलेले आहेत.
https://twitter.com/CMOMaharashtra/status/1757704324510367811?s=19
मंत्रिमंडळ बैठकीतील निर्णय संक्षिप्त स्वरूपात:-
1) मुख्यमंत्री ग्राम सडक योजनेत अतिरिक्त 7 हजार कि.मी. रस्ते व पुलांच्या कामांना मंजुरी.
2) ऑनलाईन पद्धतीने वाळू, रेती पुरविण्यासाठी सर्वंकष सुधारित रेती धोरण. ‘ना नफा, ना तोटा’ तत्त्वावर वाळू विक्री दर निश्चित करणार.
3) राज्य शासकीय कर्मचाऱ्यांची मागणी मान्य. आश्वासित प्रगती योजनेत सुधारणा होणार.
4) शासकीय वैद्यकीय महाविद्यालयातील इंटर्नशिप विद्यार्थ्यांच्या विद्यावेतनात भरीव वाढ. आता मिळणार दरमहा 18 हजार रुपये.
5) उच्च तंत्रज्ञानाच्या अतिविशाल उद्योगांना प्रोत्साहन देणार. राज्यातील कमी विकसित भागांना फायदा होणार.
6) सायन कोळीवाड्यातील सिंधी निर्वासितांच्या 25 इमारतींचा म्हाडा पुनर्विकास करणार.
7) अनुसूचित जातीच्या विद्यार्थ्यांना देण्यात येणाऱ्या मॅट्रिकपूर्व शिष्यवृत्ती योजनेसाठी सुधारित मार्गदर्शक सूचना करणार.
8) राज्यात जळगाव, लातूर, बारामती, सांगली (मिरज), नंदुरबार, गोंदिया या सहा ठिकाणी नर्सिंग महाविद्यालय उभारण्यात येणार.
9) औद्योगिक क्षेत्रात पायाभूत सुविधांना प्रोत्साहन देणार. 50 टक्के मुद्रांक शुल्क सवलत मिळणार.
10) भुदरगड तालुक्यात नवीन समाजकार्य महाविद्यालय उभारण्यात येणार.
