रायगड, 06 जून: (विश्वजीत खाटमोडे) छत्रपती शिवाजी महाराजांच्या 351 व्या शिवराज्याभिषेक सोहळ्यानिमित्त सध्या रायगडावर शिवभक्तांचे मोठी गर्दी झालेली पाहायला मिळत आहे. शिवराज्याभिषेक दिनानिमित्त राष्ट्रवादी काँग्रेस पार्टी – शरदचंद्र पवार पक्षाचे आमदार रोहित पवार यांनी आज सकाळी किल्ले रायगडावर जाऊन छत्रपती शिवाजी महाराज यांच्या पुतळ्याला पुष्पहार अर्पण करून अभिवादन केले. यावेळी त्यांच्यासोबत पक्षाचे स्थानिक पदाधिकारी, कार्यकर्ते आणि देशभरातून आलेले शिवभक्त उपस्थित होते. यावेळी रोहित पवार यांनी शिवराज्याभिषेक सोहळ्याच्या शुभेच्छा देण्यासाठी सोशल मीडियावर एक पोस्ट शेयर केली आहे. त्यांच्या या पोस्टची चर्चा राजकीय वर्तुळात रंगली आहे.
https://twitter.com/RRPSpeaks/status/1798575008333361460?s=19
मान झुकवायचीच असेल तर…
“मान झुकवायचीच असेल तर दिल्लीऐवजी इथं रायगडावर झुकवा!” असे रोहित पवार यांनी या पोस्टमध्ये म्हटले आहे. दरम्यान, त्यांची ही पोस्ट राज्यातील सत्ताधाऱ्यांना उद्देशून असल्याची चर्चा सध्या रंगली आहे. “छत्रपती शिवाजी महाराज या महापुरुषांनी दिलेले विचार जपण्याची जबाबदारी आपल्या सर्वांची आहे आणि आपली पिढी हे विचार जपतील, जगतील आणि पुढच्या पिढीपर्यंत पोचवतील, असा विश्वास आहे. सर्वांना शिवराज्याभिषेक सोहळ्याच्या लाख लाख शुभेच्छा!” असेही ते या पोस्टमध्ये म्हणाले आहेत. रोहित पवार यांनी यावेळी छत्रपती शिवाजी महाराज यांच्या पुतळ्याला अभिवादन करतानाचे फोटो देखील सोशल मीडियावर शेयर केले आहेत. याप्रसंगी त्यांनी रायगडावर उपस्थित असलेल्या शिवप्रेमींसोबत फोटो काढले.
रायगडावर विविध कार्यक्रमांचे आयोजन
दरम्यान, किल्ले रायगडावर शिवराज्याभिषेक सोहळा मोठ्या उत्साहात साजरा केला जात आहे. या पार्श्वभूमीवर, रायगडावर सध्या विविध कार्यक्रमांचे आयोजन करण्यात आले आहे. शिवराज्याभिषेक सोहळ्यासाठी दरवर्षी लाखो शिवभक्तांची रायगडावर गर्दी होत असते. त्यासाठी प्रशासनाच्या वतीने याठिकाणी मोठा बंदोबस्त तैनात करण्यात आला आहे. सोबतच रायगडावर येणाऱ्या शिवभक्तांसाठी अनेक सोयी सुविधा उपलब्ध करून देण्यात आल्या आहेत.
