इंदापूर, 04 मार्च: (विश्वजीत खाटमोडे) भाजप नेते आणि इंदापूर तालुक्याचे माजी आमदार हर्षवर्धन पाटील यांनी राज्याचे गृहमंत्री देवेंद्र फडणवीस यांना पत्र लिहिले आहे. इंदापूर तालुक्यात फिरू न देण्याच्या आपल्याला धमक्या येत असून, त्यामुळे मला माझ्या सुरक्षिततेची चिंता वाटत असल्याचे हर्षवर्धन पाटील यांनी या पत्रात म्हटले आहे. ह्या धमक्या मित्र पक्षाच्या पदाधिकाऱ्यांकडून वारंवार दिल्या जात असल्याचा आरोप हर्षवर्धन पाटील यांनी या पत्रात केला आहे. तसेच याप्रकरणी कारवाईची मागणी त्यांनी केली आहे. त्यांच्या या पत्रामुळे राजकीय वर्तुळात खळबळ उडाली आहे. दरम्यान, हर्षवर्धन पाटील यांनी या पत्रात धमकी देणाऱ्या कोणत्याही पक्षाचे किंवा पदाधिकाऱ्याचे नाव घेतलेले नाही.
मा. ना. श्री. देवेंद्रजी फडणवीस साहेब
— Harshvardhan Patil (@Harshvardhanji) March 4, 2024
उपमुख्यमंत्री तथा गृहमंत्री
महाराष्ट्र राज्य
महाराष्ट्र राज्यामध्ये महायुतीचे सरकार आपल्या मार्गदर्शनाखाली योग्य पध्दतीने कामकाज करीत आहे. परंतु माझ्या तालुक्यामध्ये मी आपल्या नेतृत्वाखाली राजकिय व सामाजिक जिवनात काम करत असताना इंदापूर… pic.twitter.com/GkPWDRPo42
हर्षवर्धन पाटलांनी पत्रात काय म्हटले?
“महाराष्ट्र राज्यामध्ये महायुतीचे सरकार आपल्या मार्गदर्शनाखाली योग्य पध्दतीने कामकाज करीत आहे. परंतु माझ्या तालुक्यामध्ये मी आपल्या नेतृत्वाखाली राजकिय व सामाजिक जीवनात काम करत असताना इंदापूर मधील मित्र पक्षांचे काही पदाधिकारी राजकीय जाहीर मेळावे व सभांमधून माझ्यावरती अतिशय खालच्या पातळीवर, एकेरी व शिवराळ भाषेत बेताल वक्तव्य करीत आहेत. त्याचबरोबर तालुक्यामध्ये फिरू न देण्याची धमकी देत आहेत. त्यामुळे मला माझ्या सुरक्षिततेची चिंता वाटत आहे,” असे हर्षवर्धन पाटील यांनी या पत्रात म्हटले आहे.
कारवाई करण्याची मागणी
“सदरील बाब अतिशय गंभीर असून, आपण यामध्ये तात्काळ लक्ष घालावे. अशा गुंड प्रवृत्तींच्या लोकांना वेळीच आळा घालणे आवश्यक आहे. तरी आपण या बाबत ठोस भूमिका घेऊन योग्य त्या कारवाईचे आदेश देऊन सहकार्य करावे, हि विनंती, असे हर्षवर्धन पाटील यांनी गृहमंत्री देवेंद्र फडणवीस यांना लिहिलेल्या पत्रात म्हटले आहे.
