दिल्ली, 01 एप्रिल: (विश्वजीत खाटमोडे) नवीन आर्थिक वर्षाच्या पहिल्याच दिवशी तेल विपणन कंपन्यांनी व्यावसायिक एलपीजी गॅस सिलेंडरच्या किमतीत मोठी कपात केली आहे. त्यानुसार, 19 किलोच्या व्यावसायिक एलपीजी सिलेंडरच्या किमतीत तब्बल 41 रुपयांची घट करण्यात आली आहे. ही कपात 01 एप्रिल 2025 पासून लागू झाली आहे. याची माहिती तेल विपणन कंपन्यांनी दिली आहे. तर या निर्णयामुळे देशभरातील हॉटेल, रेस्टॉरंट आणि अन्य व्यावसायिकांना मोठा दिलासा मिळणार आहे.
https://x.com/ANI/status/1906870400887513578
दिल्लीत किंमत किती?
हे नवीन दर लागू झाल्यानंतर दिल्लीत 19 किलोच्या व्यावसायिक एलपीजी गॅस सिलिंडरची किंमत आता 1762 रुपये झाली आहे. या कपातीपूर्वी दिल्लीत व्यावसायिक एलपीजी गॅस सिलिंडरची किंमत 1803 रुपये इतकी होती. मुंबईमध्ये आता त्याचा दर 1,714.50 रुपये झाला आहे.
मुंबईसह प्रमुख शहरांतील दर
तर यापूर्वी मुंबईत व्यावसायिक गॅस सिलिंडर 1,755.50 रुपयांना मिळत होते. तसेच कोलकातामध्ये 19 किलोच्या व्यावसायिक एलपीजी सिलेंडरची किंमत 1,872 रुपये झाली आहे, जी पूर्वी 1,913 रुपये होती. तसेच चेन्नईमध्ये ही व्यावसायिक गॅस सिलिंडर 1,965 रुपयांवरून 1,924 रुपये झाला आहे.
घरगुती गॅस सिलिंडर स्वस्त
दरम्यान, तेल विपणन कंपन्या दर महिन्याच्या 1 तारखेला एलपीजी गॅसच्या दरांमध्ये बदल करतात. मागील महिन्यात, म्हणजेच 1 मार्च रोजी 19 किलोंच्या व्यावसायिक सिलेंडरच्या किमतीत 6 रुपयांची वाढ करण्यात आली होती. तर दुसरीकडे घरगुती वापरासाठी असलेल्या 14.2 किलोच्या एलपीजी गॅस सिलेंडरच्या किमतीत कोणताही बदल करण्यात आलेला नाही. घरगुती गॅस सिलिंडरच्या किंमतीत 1 ऑगस्ट 2024 रोजी शेवटचा बदल झाला होता. सध्या दिल्लीमध्ये 14.2 किलोच्या गॅस सिलेंडरची किंमत 803 रुपये आहे, तर कोलकातामध्ये 829 रुपये, मुंबईमध्ये 802.50 रुपये आणि चेन्नईमध्ये 818.50 रुपये आहे.
