संभाजीनगर, 21 मे: (विश्वजीत खाटमोडे) पुण्यातील कल्याणी नगर परिसरात शनिवारी (दि.19) मध्यरात्रीच्या सुमारास वेगात असलेल्या एका पोर्श कारने दुचाकीला पाठीमागून जोरदार धडक दिली. या अपघातात दोघांचा मृत्यू झाला. अपघातानंतर पुणे पोलिसांनी आरोपीला अटक केली होती. या अपघाताला कारणीभूत असलेला आरोपी हा 17 वर्षांचा आहे. त्याला रविवारी कोर्टाने जामीन मंजूर केला आहे. आता याप्रकरणी पोलिसांनी मोठी कारवाई केली आहे. पुणे पोलिसांनी आरोपीचे वडील बिल्डर विशाल अग्रवाल यांना अटक केली आहे. विशाल अग्रवाल यांना आज सकाळी संभाजीनगर येथून ताब्यात घेण्यात आले असल्याची माहिती पुणे शहर पोलीस आयुक्त अमितेश कुमार यांनी दिली आहे.
https://twitter.com/AHindinews/status/1792776484429447515?s=19
मुख्य आरोपीला जामीन
तत्पूर्वी, बिल्डर विशाल अग्रवाल यांचा 17 वर्षीय मुलगा वेदांत अग्रवाल हा मद्यधुंद अवस्थेत पोर्श कार चालवत होता. यादरम्यान त्याच्या कारने एका दुचाकीला धडक दिली. या अपघातात दुचाकी वरील तरूण-तरूणीचा जागीच मृत्यू झाला. पुण्यातील कल्याणी नगर परिसरात शनिवारी मध्यरात्री ही घटना घडली होती. या प्रकरणी येरवडा पोलिसांनी आरोपी वेदांतला लगेचच अटक करण्यात आली. मात्र, आरोपी हा अल्पवयीन असल्यामुळे त्याला कोर्टाने रविवारी लगेचच जामीन मंजूर केला. त्यामुळे कोर्टाच्या निकालावर समाज माध्यमातून उघडपणे नाराजी व्यक्त करण्यात येत होती.
आरोपीच्या वडिलांना अटक
त्यानंतर आता पुणे शहर पोलिसांनी मोठी कारवाई करत या प्रकरणातील अल्पवयीन आरोपीच्या वडिलांना अटक केली आहे. तत्पूर्वी मुलगा अल्पवयीन असून देखील त्याच्या हातात कार दिल्याप्रकरणी विशाल अग्रवाल यांच्या विरोधात गुन्ह्याची नोंद झाली होती. तेंव्हापासून ते फरार झाले होते. आज अखेर पोलिसांनी विशाल अग्रवाल यांचा शोध घेऊन त्यांना संभाजीनगर येथून अटक केली. त्यांना आता कोर्टात हजर केले जाणार आहे.
