नैनिताल, 09 एप्रिल: (विश्वजीत खाटमोडे) उत्तराखंडमधील नैनिताल येथे भीषण अपघात झाला आहे. नैनिताल जवळील बेतालघाट येथे एक पिकअप 200 मीटर खोल दरीत कोसळला. रात्री 10.30 च्या सुमारास हा अपघात झाला. या अपघातात आठ जणांचा मृत्यू झाला आहे. तर दोन जण गंभीर जखमी आहेत. त्यांच्यावर सध्या रुग्णालयात उपचार सुरू आहेत. उत्तराखंडच्या नैनिताल परिसरातील बेतालघाट येथील उंचाकोटमधील मल्लागाव येथे रात्री उशीरा एक पिकअप वाहन 200 मीटर खोल दरीत कोसळले. या वाहनात 10 नेपाळी मजूर होते, अशी माहिती पोलिसांनी दिली आहे.
https://twitter.com/AHindinews/status/1777566505644740739?s=19
गाडीत नेपाळी मजूर होते
बेतालघाट परिसरात पिण्याच्या पाण्याची लाईन टाकण्याचे काम आटोपून सर्वजण घरी परतत असताना हा अपघात झाला. दरम्यान, मृत्युमुखी पडलेल्या मजुरांची ओळख अद्याप पटलेली नाही. त्याचा तपास सध्या पोलीस करीत आहेत. या घटनेत दोन मजूर गंभीर जखमी झाले आहेत. त्यांना या अपघातानंतर तातडीने रुग्णालयात दाखल करण्यात आले आहे. सध्या त्यांची प्रकृती स्थिर आहे. चालकाचा गाडीवरील ताबा सुटल्याने हा अपघात झाला असल्याचा प्राथमिक अंदाज पोलिसांनी वर्तविला आहे.
तत्पूर्वी, सोमवारी रात्री उशिरा पिकअप खड्ड्यात पडल्याची माहिती पोलिसांना मिळाली. या घटनेची माहिती मिळताच, पोलीस घटनास्थळी दाखल झाले. त्यावेळी पोलिसांनी लोकांच्या मदतीने बचावकार्य सुरू केले. त्यानंतर पोलीस आणि स्थानिक लोकांनी या वाहनातून 8 मजुरांचे मृतदेह मोठ्या मुश्किलीने बाहेर काढले. यासोबतच त्यांनी दोघा जखमींना उपचारासाठी रुग्णालयात दाखल केले. सध्या या अपघाताची चौकशी पोलीस करीत आहेत.
