मुंबई, 07 ऑगस्ट: (विश्वजीत खाटमोडे) राज्याचे मुख्यमंत्री एकनाथ शिंदे यांच्या अध्यक्षतेखाली बुधवारी (दि.07) राज्य मंत्रिमंडळाची बैठक पार पडली. या बैठकीत विविध महत्त्वाचे निर्णय घेण्यात आले आहेत. या बैठकीला मुख्यमंत्री एकनाथ शिंदे यांच्यासह उपमुख्यमंत्री देवेंद्र फडणवीस, उपमुख्यमंत्री अजित पवार, तसेच मंत्रिमंडळातील विविध खात्यांचे मंत्री उपस्थित होते. या बैठकीत 15 ऑगस्ट स्वातंत्र्य दिनाच्या पार्श्वभूमीवर राज्यात हर घर तिरंगा अभियान राबविण्याचा निर्णय घेण्यात आला आहे. त्यानुसार, राज्यभरात येत्या 9 ऑगस्टपासून हर घर तिरंगा अभियान मोठ्या प्रमाणात राबविण्यात येणार आहे. या अभियानात राज्यातील अडीच कोटी घरांवर तिरंगा फडकविण्याचे सरकारचे उद्दिष्ट आहे.
मंत्रिमंडळाच्या बैठकीतील निर्णय संक्षिप्त स्वरूपात
1) शेतकरी आत्महत्याग्रस्त जिल्ह्यांमध्ये मोठ्या प्रमाणावर सिंचन. महत्वाकांक्षी वैनगंगा-नळगंगा नदीजोड प्रकल्पास मान्यता; पावणे चार लाख हेक्टर क्षेत्राचे सिंचन होणार.
2) लहान शहरांतील पायाभूत सुविधांना वेग येणार; कर्ज उभारण्यास मान्यता देण्यात येणार.
3) 9 ऑगस्टपासून राज्यात हर घर तिरंगा अभियान मोठ्या प्रमाणावर राबविणार. अडीच कोटी घरांवर तिरंगा फडकविणार. विविध कार्यक्रमांचे आयोजन केले जाणार.
4) आता प्रकल्पबाधितांना सदनिका मिळणार. धोरणास मान्यता देण्यात येणार.
5) आदिवासी विभागातील प्राथमिक शिक्षकांना शिक्षण पात्रता परीक्षा उत्तीर्ण होण्यासाठी दोन वर्षे मुदतवाढ देण्यात आली.
6) अनुसूचित जाती जमातीच्या जात, वैधता प्रमाणपत्र मिळण्याबाबतच्या अडचणी दूर होणार. अधिनियमात सुधारणा करण्याचा निर्णय घेण्यात आला.
7) आता विना परवानगी झाड तोडल्यास आता 50 हजार रुपयांचा दंड होणार.
8) महाराष्ट्र लॉजिस्टिक धोरण राबविणार. पाच वर्षात तीस हजार कोटींचे उत्पन्न मिळणार.
9) कागल येथे आयुर्वेद महाविद्यालय; आजरा तालुक्यात योग व निसर्गोपचार महाविद्यालय
10) न्यायमूर्ती, मुख्य न्यायमूर्तीना सेवा निवृत्तीनंतर घर कामगार, वाहनचालक सेवा
11) सेना कल्याण शैक्षणिक संस्था आणि राधा कल्याणदास दर्यानानी चॅरिटेबल ट्रस्टला मुद्रांक शुल्कात 100 टक्के सूट मिळणार.
12) जुन्नरच्या श्री कुकडेश्वर आदिवासी हिरडा औद्योगिक सहकारी संस्थेस अर्थसहाय्य मिळणार.
