मुंबई, 11 जून: (विश्वजीत खाटमोडे) राज्यात गेल्या काही दिवसांपासून मुसळधार पाऊस कोसळत आहे. तसेच राज्यातील कोकण, मध्य महाराष्ट्र, विदर्भ आणि मराठवाड्यात तुरळक ठिकाणी वादळी वाऱ्यासह आणि विजांच्या कडकडाटासह मुसळधार ते अति मुसळधार पाऊस पडण्याची शक्यता हवामान विभागाने वर्तविली आहे. तसेच यादरम्यान 50 ते 60 किमी प्रतितास वेगाने वारे वाहू शकते, असे हवामान विभागाने म्हटले आहे. या पार्श्वभूमीवर, राज्यातील काही जिल्ह्यांना पावसाचा ऑरेंज आणि येलो अलर्ट जारी करण्यात आला आहे.
https://twitter.com/RMC_Mumbai/status/1800436709685088512?s=19
या जिल्ह्यांना अलर्ट जारी
यामध्ये कोकणातील रत्नागिरी आणि सिंधुदुर्ग या जिल्ह्यांना हवामान विभागाने आज ऑरेंज अलर्ट जारी केला आहे. रत्नागिरी आणि सिंधुदुर्ग जिल्ह्यातील काही ठिकाणी आज मुसळधार ते अति मुसळधार पाऊस पडण्याची दाट शक्यता असल्याचे हवामान विभागाने म्हटले आहे. तसेच राज्यातील पालघर, ठाणे, मुंबई, रायगड, जळगाव, नाशिक, अहमदनगर, पुणे, कोल्हापूर, सातारा, सांगली, सोलापूर, छत्रपती संभाजीनगर, जालना, परभणी, बीड, हिंगोली, नांदेड, लातूर, धाराशिव, अकोला, अमरावती, भंडारा, बुलढाणा, चंद्रपूर, गडचिरोली, गोंदिया, नागपूर, वर्धा, वाशिम आणि यवतमाळ या जिल्ह्यांतील काही ठिकाणी आज वादळी वारे आणि विजांच्या कडकडाटासह मुसळधार पावसाची दाट शक्यता वर्तविण्यात आली आहे. या पार्श्वभूमीवर, वरील सर्व जिल्ह्यांना आज पावसाचा येलो अलर्ट जारी करण्यात आला आहे. या संदर्भातील माहिती हवामान विभागाने दिली आहे.
राज्यात मुसळधार पाऊस
दरम्यान, मान्सूनच्या आगमनानंतर राज्यात पावसाने चांगली सुरूवात केली आहे. गेल्या काही दिवसांपासून राज्याच्या बहुतांश भागात सातत्याने पाऊस कोसळत आहे. त्यामुळे तेथील तापमानात मोठ्या प्रमाणात घट झाली आहे. तसेच वातावरणात काहीसा गारवा निर्माण झाला आहे. त्यामुळे उकाड्याने हैराण झालेल्या नागरिकांना मोठा दिलासा मिळाला आहे. याशिवाय, सध्या चांगला पाऊस पडत असल्यामुळे राज्यातील शेतकरी ही सुखावला आहे.
