मुंबई, 18 फेब्रुवारी: (विश्वजीत खाटमोडे) मुख्यमंत्री देवेंद्र फडणवीस यांच्या अध्यक्षतेखाली आज (दि.18) राज्य मंत्रिमंडळाची बैठक पार पडली. या बैठकीत जलसंपदा, गृह, सार्वजनिक बांधकाम, वित्त तसेच महसूल विभागातील महत्वपूर्ण निर्णय घेण्यात आले. या बैठकीला राज्य मंत्रिमंडळातील विविध विभागांचे मंत्री आणि अधिकारी उपस्थित होते.
https://x.com/AjitPawarSpeaks/status/1891783730760646885?t=YlUuhy5dYVshVnlOuE3r7g&s=19
मंत्रिमंडळ बैठकीतील प्रमुख निर्णय:
म्हैसाळ उपसा सिंचन योजनेसाठी सौर ऊर्जा प्रकल्प (जलसंपदा विभाग)
म्हैसाळ उपसा सिंचन योजनेची ऊर्जा कार्यक्षमता वाढविण्यासाठी 1 हजार 594 कोटी रुपयांच्या सौर ऊर्जा प्रकल्पास मान्यता देण्यात आली. या प्रकल्पामुळे अवर्षण प्रवण भागातील 1 लाख 08 हजार 197 हेक्टर क्षेत्राला सिंचन सुविधा मिळणार आहेत.
अंमली पदार्थ विरोधी टास्क फोर्ससाठी नवीन पदे (गृह विभाग)
राज्यात अंमली पदार्थ विरोधी टास्क फोर्स सशक्त करण्यासाठी 346 नवीन पदांची निर्मिती करण्यास आणि त्यासाठी आवश्यक खर्चास मंजुरी देण्याचा निर्णय घेण्यात आला आहे.
सहावा राज्य वित्त आयोग स्थापन (वित्त विभाग)
राज्यातील वित्तीय व्यवस्थापन अधिक प्रभावी करण्याच्या दृष्टीने सहावा राज्य वित्त आयोग स्थापन करण्यास मान्यता देण्यात आली.
रोपवे प्रकल्पांसाठी जागा उपलब्ध (सार्वजनिक बांधकाम विभाग)
राज्यातील विविध रोपवे प्रकल्पांच्या कामांसाठी राष्ट्रीय राजमार्ग लॉजिस्टिक व्यवस्थापन लि. यांना आवश्यक जागा उपलब्ध करून देण्याचा निर्णय घेण्यात आला.
वरखेडे लोंढे (बॅरेज) मध्यम प्रकल्पासाठी निधी मंजूर (जलसंपदा विभाग)
जळगाव जिल्ह्यातील चाळीसगाव तालुक्यात वरखेडे लोंढे (बॅरेज) मध्यम प्रकल्पासाठी 1 हजार 275 कोटी 78 लाख रुपयांच्या तरतूदीस मान्यता देण्यात आली. या प्रकल्पामुळे चाळीसगाव आणि भडगाव तालुक्यातील 8 हजार 290 हेक्टर क्षेत्र सिंचनाखाली येणार आहे.
पुण्यातील दिनानाथ मंगेशकर रुग्णालयाला जमीन मंजूर (महसूल विभाग)
पुण्यातील दिनानाथ मंगेशकर रुग्णालयाला नाल्यावरील पुलाच्या बांधकामासाठी आवश्यक जमीन देण्यास राज्य सरकारची मंजुरी मिळाली आहे.
