मुंबई, 19 जुलै: (विश्वजीत खाटमोडे) राष्ट्रवादी काँग्रेस पार्टी शरदचंद्र पवार पक्षाचे अध्यक्ष शरद पवार यांना राज्य निवडणूक आयोगाने मोठा दिलासा दिला आहे. निवडणूक आयोगाने बिगुल आणि तुतारी (पिपाणी) ही चिन्हे गोठवण्यात आल्याचे जाहीर केले आहे. त्याचबरोबर राज्य निवडणूक आयोगाने राष्ट्रवादी काँग्रेस पार्टी शरदचंद्र पवार पक्षाच्या ‘तुतारी वाजवणारा माणूस’ या चिन्हाला अधिकृत मान्यता दिली आहे. तसेच राष्ट्रवादी काँग्रेस पार्टी शरदचंद्र पवार पक्षाच्या उमेदवारांना आता आगामी सार्वत्रिक आणि पोटनिवडणुकीत तुतारी या चिन्हावर निवडणूक लढवता येणार असल्याचे देखील निवडणूक आयोगाने म्हटले आहे. त्यामुळे शरद पवार यांच्या पक्षाला मोठा दिलासा मिळाला आहे. या संदर्भातील परिपत्रक निवडणूक आयोगाने प्रसिद्ध केले आहे.
https://x.com/NCPspeaks/status/1814211412056850666?s=19
लोकसभा निवडणुकीत बसला होता फटका
तत्पूर्वी, यंदाच्या लोकसभा निवडणुकीत बिगुल आणि तुतारी या चिन्हांमुळे राष्ट्रवादी काँग्रेस पार्टी शरदचंद्र पवार पक्षाला मोठा फटका बसला होता. लोकसभा निवडणुकीत बिगुल आणि तुतारी या नावाची चिन्हे अपक्ष उमेदवारांना देण्यात आली होती. ही चिन्हे राष्ट्रवादी काँग्रेस पार्टी शरदचंद्र पवार पक्षाच्या तुतारी वाजवणारा माणूस या चिन्हासारखीच होती. तसेच यातील पिपाणी या चिन्हाला निवडणूक चिन्हांच्या यादीत तुतारी असे नाव देण्यात आले होते. त्यामुळे लोकसभा निवडणुकीत मतदारांमध्ये संभ्रम निर्माण झाला. याचा फटका राष्ट्रवादी काँग्रेस पार्टी शरदचंद्र पवार पक्षाच्या वाजवणारा माणूस या चिन्हावर निवडणूक लढविणाऱ्या उमेदवारांना बसला असल्याचे त्यांच्या पक्षातील अनेकांनी म्हटले होते.
सदर चिन्हे गोठवण्याची केली होती मागणी
या पार्श्वभूमीवर, बिगुल आणि तुतारी (पिपाणी) ही चिन्हे गोठविण्यात यावीत, अशी मागणी राष्ट्रवादी काँग्रेस पार्टी शरदचंद्र पवार पक्षाकडून करण्यात आली होती. यासंदर्भात त्यांनी राज्य निवडणूक आयोगाकडे तक्रार केली होती. त्यानुसार, निवडणूक आयोगाने आता राष्ट्रवादी काँग्रेस पार्टी शरदचंद्र पवार पक्षाला दिलासा देत बिगुल आणि तुतारी (पिपाणी) ही चिन्हे गोठवण्याचा निर्णय घेतला आहे. निवडणूक आयोगाच्या या निर्णयाचे स्वागत राष्ट्रवादी काँग्रेस पार्टी शरदचंद्र पवार पक्षाने केले आहे. “अखेर सत्याचाच विजय झाला! निवडणूक आयोगाने ‘तुतारी’ आणि ‘बिगुल’ ही मुक्तचिन्ह गोठवली. ‘पिपाणी’, ‘बिगुल’ ह्या चिन्हाचा ‘तुतारी’ असा वापर करून मतदारांची दिशाभूल करण्याचा जो प्रयत्न झाला त्याविरोधात ‘राष्ट्रवादी काँग्रेस पार्टी- शरदचंद्र पवार’ पक्षाच्या लढ्याला यश. आता दिशाभूल करणारं नाही तर महाराष्ट्राला दिशा देणारं ‘तुतारी वाजवणारा माणूस’ हेच चिन्ह फक्त मतदान यंत्रावर दिसणार! असे ट्विट त्यांनी केले आहे.
