पुणे, 12 मार्च: (विश्वजीत खाटमोडे) येत्या लोकसभा निवडणुकीच्या तोंडावर महाराष्ट्र नवनिर्माण सेना पक्षाला मोठा धक्का बसला आहे. पुण्यातील नेते वसंत मोरे यांनी मनसेला रामराम ठोकला आहे. यावेळी वसंत मोरे यांनी मनसेच्या प्राथमिक सदस्यत्व आणि इतर सर्व पदांचा राजीनामा दिला आहे. या संदर्भातील घोषणा त्यांनी सोशल मीडियावरून केली आहे. वरिष्ठ पदाधिकाऱ्यांच्या राजकारणाला कंटाळून आपण पक्ष सोडण्याचा निर्णय घेतला असल्याचे वसंत मोरे यांनी या पोस्टमध्ये म्हटले आहे. त्यामुळे राजकीय वर्तुळात त्याची चर्चा सुरू झाली आहे.
अखेरचा जय महाराष्ट्र साहेब मला माफ करा … pic.twitter.com/25IQRaLfXQ
— Vasant More | वसंत मोरे (@vasantmore88) March 12, 2024
“पक्षाच्या स्थापनेपासून (किंबहुना त्याही आधीपासून) पक्षाचा सदस्य आणि इतर पदांवर काम करत असताना आपण दिलेल्या जबाबदाऱ्या आणि आदेश यांचे पालन करण्याचा मी माझ्या परीने प्रयत्न करत आलो आहे. पक्ष संघटना वाढीसाठी गेली 18 वर्ष सातत्याने काम करत असताना पुणे शहरात आणि सरचिटणीस म्हणून महाराष्ट्रात कार्यरत राहिलो. परंतु अलीकडच्या काळात पुणे शहरातील वरिष्ठ पदाधिकाऱ्यांकडून माझ्या विरोधात होत असलेले पक्षांतर्गत गलिच्छ राजकारण व पक्षाप्रति असलेल्या माझ्या निष्ठेवर उपस्थित होत असलेले प्रश्नचिन्ह माझ्यासाठी अत्यंत वेदनादायी आहे,” असे वसंत मोरे यांनी यामध्ये म्हटले आहे.
“भविष्यात पक्षाचे लोकप्रतिनिधी निवडून यावेत, यासाठी मी स्थानिक पदाधिकाऱ्यांना सामावून घेऊन मदत व उपक्रम देतो, त्यांना ताकद देतो त्या सहकाऱ्यांची शहरातील वरिष्ठ पदाधिकाऱ्यांकडून कोंडी करण्याचे तंत्र अवलंबले जात आहे, म्हणून मी आज महाराष्ट्र नवनिर्माण सेनेच्या प्राथमिक सदस्यत्वासह सर्व पदांचा राजीनामा देत आहे. कृपया आपण तो स्वीकारावा ही नम्र विनंती,” असे त्यांनी या पोस्टमध्ये म्हटले आहे. या राजीनाम्याच्या पोस्ट सोबत वसंत मोरे यांनी मनसे अध्यक्ष राज ठाकरे यांच्या फोटोला साष्टांग नमस्कार घातलेला त्यांचा फोटो देखील शेयर केला आहे.
