बारामती, 05 मार्च: भारतरत्न डॉ. बाबासाहेब आंबेडकर स्टेडियमच्या देखभालीवरून बारामतीत नवीन वाद निर्माण झाला आहे. हे स्टेडियम देखभाल दुरूस्तीसाठी आणि क्रिकेट अकादमी चालवण्यासाठी धो. आ. सातव उर्फ कारभारी आण्णा चॅरिटेबल फाऊंडेशनला भाडेतत्त्वावर देण्यात आले आहे. मात्र, या ठेकेदाराने स्टेडियमच्या दर्शनी भागात “कारभारी जिमखाना” नावाचे मोठे होर्डिंग लावले आहे. हे होर्डिंग्ज महामानव भारतरत्न डॉ. बाबासाहेब आंबेडकर यांचे नाव कमी लेखण्याच्या जातीवादी हेतूने लावल्याचा आरोप स्थानिक आंबेडकरी चळवळीतील कार्यकर्ते आणि नागरिकांनी केला आहे.
गुन्हा दाखल करण्याची मागणी
या होर्डिंग्जमुळे स्थानिक आंबेडकरी चळवळीतील कार्यकर्ते आणि नागरिकांमध्ये तीव्र नाराजी निर्माण झाली आहे. बारामती नगर परिषदेची कोणतीही पूर्वपरवानगी न घेता आणि करारातील अटी आणि नियमांचे उल्लंघन करून हे होर्डिंग्ज लावण्यात आले आहे, असा आरोप आहे. त्यामुळे हे होर्डिंग्ज तातडीने काढून टाकावेत आणि धो. आ. सातव उर्फ कारभारी आण्णा चॅरिटेबल फाउंडेशनच्या चालक-मालक यांच्यावर सार्वजनिक मालमत्तेचे विद्रूपीकरण केल्याचा गुन्हा दाखल करण्यात यावा, अशी मागणी करण्यात आली आहे.
नागरिकांचा वीजपुरवठा खंडित
यासोबतच, स्टेडियम शेजारी राहणाऱ्या बहुसंख्य अनुसूचित जातीच्या नागरिकांना ज्या विद्युत वाहिनीमधून वीज पुरवठा केला जातो, ती विद्युत वाहिनी देखील याच ठेकेदाराच्या अशास्त्रीय कामाच्या पद्धतीमुळे तुटल्याने स्टेडियम शेजारी राहणाऱ्या बहुसंख्य अनुसूचित जातीतील नागरिकांच्या घरातील वीज पुरवठा दि. 28 फेब्रुवारी 2025 रोजी सकाळी 11 वाजल्यापासून ते दि. 01 मार्च 2025 रोजी दुपारी 1 वाजेपर्यंत साधारणतः 24 तासांपेक्षा अधिक काळ खंडित झाला होता. त्यामुळे करारातील नियम आणि अटींचे उल्लंघन करणाऱ्या तसेच कायदा न मानणाऱ्या धो. आ. सातव उर्फ कारभारी आण्णा चॅरिटेबल फाउंडेशनचे चालक मालक यांच्यावर गुन्हा दाखल करून त्यासोबत झालेला करार रद्द करण्यात यावा, अशी मागणी करण्यात आली आहे. अन्यथा तीव्र स्वरूपाचे आंदोलन करण्यात येईल, असा देण्यात आला आहे.
या संदर्भातील लेखी निवेदन बारामती नगर परिषदेचे मुख्याधिकारी महेश रोकडे आणि बारामती शहर पोलीस निरीक्षक विलास नाळे यांना देण्यात आले आहे. याप्रसंगी रिपब्लिकन पार्टी ऑफ इंडिया (आठवले) पक्षाचे पुणे जिल्हा युवक कार्याध्यक्ष रविंद्र (पप्पू) सोनवणे, बारामती शहराध्यक्ष अभिजित कांबळे, भाजपचे ॲड. अक्षय गायकवाड, अमर भंडारे, गणेश जाधव, मोहन शिंदे, सुमित सोनवणे, इंद्रजित साळवे, सूरज मोरे, सचिन शिंदे, निलेश शेंडगे, विनोद काळे, किरण नागे आदी स्थानिक आंबेडकरी चळवळीतील कार्यकर्ते मोठ्या संख्येने उपस्थित होते.
