सातारा, 17 मार्च: आंतरराष्ट्रीय महिला दिनाच्या पार्श्वभूमीवर ध्यास फाऊंडेशनतर्फे दीपस्तंभ नारी सन्मान पुरस्कारांचे सातारा येथे वितरण करण्यात आले. या सोहळ्यात फलटणच्या ॲड. कांचनकन्होजाताई धोंडीराम खरात यांना सन्मानित करण्यात आले. हा पुरस्कार वितरण सोहळा जिल्हा क्रीडा अधिकारी नितीन तारळकर, ज्येष्ठ साहित्यिक व शिंदे फर्निचरचे प्रोप्रायटर वसंत शिंदे, तसेच न्यूट्रिशन आणि डायटीशियन अमेय भागवत यांच्या प्रमुख उपस्थितीत पार पडला. या कार्यक्रमात विविध सामाजिक क्षेत्रांत उल्लेखनीय कार्य करणाऱ्या नऊ महिलांचा यावेळी गौरव करण्यात आला.
पुरस्कारप्राप्त महिलांमध्ये फलटण येथील ॲड. कांचनकन्होजाताई धोंडीराम खरात, सातारा येथील डॉ. शुभांगी गायकवाड, औंध येथील शैला वसंत यादव, सासवड येथील कुमुदिनी जगदीश पांढरे, रायगड येथील विमल चिंतामणराव मुंडे, सांगली येथील डॉ. नीलम दिलीप शिंदे, खटाव येथील हेमलता किसन फडतरे आणि सातारा येथील ॲड. सुचित्रा काटकर यांचा समावेश होता.
यावेळी नितीन तारळकर व वसंत शिंदे यांनी आपल्या सद्भावना सर्व महिलांना दिल्या आणि त्यांनी ध्यास फाउंडेशनच्या कार्याचा गौरव केला. या कार्यक्रमात नितीन तारळकर यांनी खेळाचे महत्व व स्त्री विकास याचे महत्त्व विशद केले. तर श्री वसंत शिंदे यांनी महिला दिनाचा इतिहास सांगत महिला कालची व आजची यावरती दोन कविता सादर केल्या.
या कार्यक्रमाची सुरूवात श्री गणेश वंदन करून झाले. तर ध्यास फाऊंडेशनच्या अध्यक्षा डॉ. वैजयंती ओतारी यांनी या कार्यक्रमाचे प्रास्ताविक व परिचय करून दिला. सत्कारमूर्तींचा परिचय डॉ. सरिता नाईक, सुप्रिया जाधव आणि धनश्री जगताप यांनी करून दिला. तसेच कार्यक्रमाचे सूत्रसंचालन पदमा ओतारी यांनी केले, तर ॲड. सुरेश रुपनवर यांनी आभार मानले. यावेळी अंधभगिनी प्रमिला जाधव यांनी उपस्थित मान्यवरांना व पुरस्कार विजेत्या भगिनींना खत निर्मितीची बास्केट भेट दिली. तर या कार्यक्रमाची सांगता राष्ट्रगीताने झाली.
