खत निर्मिती कंपनीत विषारी वायूची गळती; तीन जणांचा मृत्यू

सांगली, 22 नोव्हेंबर: (विश्वजीत खाटमोडे) सांगली जिल्ह्यातील एका खत निर्मिती कंपनीत विषारी वायूची गळती झाल्याची घटना घडली आहे. या घटनेत तिघांचा मृत्यू झाला. तर यामध्ये 9 जणांना रुग्णालयात दाखल करण्यात आले आहे, अशी माहिती एका अधिकाऱ्याने शुक्रवारी (दि.22) दिली आहे. दरम्यान, सांगली जिल्ह्यातील कडेगाव तालुक्यातील शाळगाव एमआयडीसी मधील म्यानमार केमिकल कंपनीत गुरूवारी (दि.21) सायंकाळी 6.30 वाजण्याच्या सुमारास ही घटना घडली.

https://x.com/PTI_News/status/1859852209648734299?t=mBfBeJpKktWSA2vdodMinw&s=19

https://x.com/ANI/status/1859871687992541393?t=B9ploGNiMtOuhTliissyfg&s=19

9 जणांवर उपचार सुरू

या खत निर्मिती प्रकल्पातील रिॲक्टरमध्ये झालेल्या स्फोटानंतर ही गॅस गळती झाल्याची माहिती अधिकाऱ्यांनी दिली आहे. त्यावेळी या स्फोटामुळे मोठ्या प्रमाणात रासायनिक धूर निघत असल्याचे दिसत होते. या घटनेची माहिती मिळताच स्थानिक प्रशासन आणि पोलिसांनी घटनास्थळी पोहोचून मदत आणि बचावकार्य सुरू केले. त्यावेळी या गॅस गळतीमुळे 12 जणांना रुग्णालयात दाखल करण्यात आले. त्यातील 3 जणांचा रुग्णालयात उपचारादरम्यान मृत्यू झाला. मृतांमध्ये दोन महिलांचा समावेश आहे. तर 9 जणांवर सध्या रुग्णालयात उपचार करण्यात येत आहे.

घटनेचा तपास सुरू

तत्पूर्वी, या खत निर्मिती कंपनीत विषारी वायूची गळती कशी झाली? याचे कारण अद्याप समजू शकलेले नाही. त्याचा तपास सध्या पोलीस करीत आहेत. यासंदर्भात सखोल चौकशी करण्याचे आदेश प्रशासनाकडून देण्यात आलेले आहे. दरम्यान, या घटनेमुळे परिसरात एकच खळबळ उडाली आहे. तसेच या प्रकरणातील दोषींवर कडक कारवाई करण्याची मागणी केली जात आहे.