पुणे, 2 जूनः पुण्यातील मेट्रोवर मोठ्या प्रमाणात खर्च केला जात आहे. तो आवश्यक असला तरी राज्य परिवहन महामंडळाच्या 3 हजार बसेसचे नियोजन राज्याच्या अर्थसंकल्पात केलेले आहे. सर्व बसेस विद्युत घटावर चालणाऱ्या करण्यासाठी आवश्यक सर्व कार्यवाही करण्यात येईल, असे उपमुख्यमंत्री तथा पुण्याचे पालकमंत्री अजित पवार यांनी नुकतेच सांगितले आहे.
पुणे प्रादेशिक परिवहन कार्यालयाच्या आळंदी रोड कार्यालयाच्या चाचणी मैदानावर उभारलेल्या 250 मीटर ब्रेक टेस्ट ट्रॅक आणि माजी खासदार अनिल शिरोळे यांच्या खासदार निधीतून उभारलेल्या हलक्या वाहनांसाठी ‘रोलर ब्रेक टेस्टर’चे उद्घाटन उपमुख्यमंत्री अजित पवार यांच्या हस्ते आणि परिवहन मंत्री ॲड. अनिल परब यांच्या उपस्थितीत संपन्न झाले.
यावेळी विधानपरिषदेच्या उपसभापती डॉ. नीलम गोऱ्हे, खासदार गिरीश बापट, आमदार सुनील टिंगरे, सिद्धार्थ शिरोळे, ज्येष्ठ सामाजिक कार्यकर्ते बाबा आढाव, परिवहन विभागाचे अपर मुख्य सचिव आशिष कुमार सिंह, परिवहन आयुक्त अविनाश ढाकणे, विभागीय आयुक्त सौरभ राव, जिल्हाधिकारी डॉ. राजेश देशमुख आदी उपस्थित होते.
जागेची अडचण असतानाही काटकोनात हा ब्रेक टेस्ट ट्र्रॅक बसवल्यामुळे वाहनमालकांची चांगली व्यवस्था झाल्याचे अजित पवार यांनी सांगितले. तसेच वाहनांची योग्यता (फिटनेस) चाचणी करण्यासाठी 30 किलोमीटर लांब दिवे घाटात जावे लागत होते. त्यामुळे त्या मार्गावर मोठ्या प्रमाणात रहदारी तसेच प्रदूषण व्हायचे. त्याला आता या टेस्ट ट्रॅकमुळे आळा बसणार असल्याचे त्यांनी सांगितले.