बारामती, 15 एप्रिलः बारामती शहरात गुरुवार, 14 एप्रिल रोजी भारतरत्न डॉ. बाबासाहेब आंबेडकर यांची 131 वी जयंती मोठ्या उत्साहात साजरी करण्यात आली. जयंतीनिमित्त बारामती शहरात विविध स्तुत्य उपक्रम, गायन- नृत्याचे कार्यक्रम, आरोग्य शिबिर, विविध स्पर्धांसह अन्नदानांचे कार्यक्रमही पार पडले. सदर कार्यक्रमात मोठ्या संख्येने नागरीकांनी सहभाग नोंदविला.
कोरोनामुळे दोन वर्षापासून देशात सण उत्सवांसह महापुरुषांच्या जयंती ह्या होऊ शकल्या नाही. मात्र, कोरोनाचे निर्बंध उठल्यानंतर सण-उत्सवांसह महापुरुषांची जयंती मिरवणुकींना परवानगी मिळाली. यामुळे नागरीकांमध्ये दोन वर्षांच्या कोरोना काळानंतर आनंदाचे वातावरण आहे. हाच आनंद बारामती शहरात साजरी होणाऱ्या डॉ. बाबासाहेब आंबेडकर यांच्या जयंती मिरवणुकीत दिसून आला. या जयंती मिरवणुकीला हजारोंच्या संख्येने आंबेडकरी जनतेने सहभाग नोंदविला. यंदाही पुरुषांपेक्षा महिलांची संख्या ही पूर्वी पेक्षा जास्तच जाणवली. मात्र यंदाची जयंती ही पूर्वींच्या जयंतीपेक्षा वेगळीच ठरली.
बारामती शहरात डॉ.बाबासाहेब आंबेडकर यांच्या जयंतीत महापुरुषांचे फोटो हे ट्रॅक्टर ट्रॉलीत लावण्यात येतात. यात डॉ.बाबासाहेब आंबेडकर, महात्म ज्योतिबा फुले, छत्रपती शाहू महाराज, गौतम बुद्ध या महामानवांचे फोटो असतात. मात्र यंदा जयंतीत फोटोंऐवजी पुतळ्यांचा वापर करण्यात आला. तसेच यात डॉ.बाबासाहेब आंबेडकर, महात्म ज्योतिबा फुले, छत्रपती शाहू महाराज, गौतम बुद्ध यांच्यासह छत्रपती शिवाजी महाराज आणि लोकशाहीर आण्णभाऊ साठे यांचाही पुतळा पाहण्यास मिळाला.
