पुणे, 23 मे: (विश्वजीत खाटमोडे) पुण्यातील वैष्णवी हगवणे मृत्यू प्रकरणात पोलिसांनी मोठी कारवाई करत फरार आरोपी राजेंद्र हगवणे आणि सुशील हगवणे यांना आज (दि.23) ताब्यात घेतले आहे. वैष्णवी हगवणे या विवाहितेने हुंड्यासाठी होणाऱ्या छळामुळे आत्महत्या केल्याची दुर्दैवी घटना शुक्रवारी (दि.16) घडली होती. तेंव्हापासून वैष्णवी हगवणे यांचे सासरे राजेंद्र हगवणे आणि दीर सुशील हगवणे हे दोघेही फरार झाले होते. त्यांच्या शोधासाठी पोलिसांनी अनेक पथके तैनात केली होती.
https://x.com/ChakankarSpeaks/status/1925731550378733714?t=dQ_bU1OMkkRrQSvcmGS2nw&s=19
फरार आरोपींना अटक
तर याआधी वैष्णवीचा पती शंशाक, सासू लता आणि नणंद करिश्मा यांना अटक करण्यात आली होती. आता सासरा आणि दीरालाही अटक करण्यात पोलिसांना यश आले आहे. अशी माहिती राज्य महिला आयोगाच्या अध्यक्षा रुपाली चाकणकर यांनी दिली आहे. “वैष्णवी हगवणे प्रकरणातील दोन्ही फरार आरोपी आज पोलिसांनी ताब्यात घेतले. या घटनेत पहिल्याच दिवशी राज्य महिला आयोगाकडून सुमोटो दाखल करण्यात आला होता. कायदा, सुव्यवस्था व प्रशासन त्यांचे काम उत्तमरित्या करत आहे. गुन्हा नोंद करण्यात आला आहे. आरोपींवर कडक कारवाई होईल यासाठी राज्य महिला आयोग पाठपुरावा करत आहे,” असे रुपाली चाकणकर यांनी सोशल मीडियावर पोस्ट करत सांगितले आहे.
हुंड्यासाठी मानसिक आणि शारीरिक छळ
दरम्यान, वैष्णवी आणि शंशाक यांच्या विवाहप्रसंगी हगवणे कुटुंबीयांनी तब्बल 51 तोळे सोने, फॉर्च्यूनर कार आणि अन्य गृहउपयोगी वस्तू दिल्या होत्या. तरीदेखील वैष्णवीवर हुंड्यासाठी मानसिक आणि शारीरिक छळ केला जात असल्याचा आरोप वैष्णवी यांच्या जाऊ मयुरी जगताप यांनी केला आहे.
https://x.com/mahancpspeaks/status/1925490482643177838?t=LeZQmnjeOLzJ0y20T_Or0A&s=19
राजेंद्र हगवणे ची राष्ट्रवादीतून हकालपट्टी
दरम्यान, दरम्यान, राजेंद्र हगवणे हे उपमुख्यमंत्री अजित पवार यांच्या राष्ट्रवादी काँग्रेस पक्षाचे माजी नेते होते. मात्र ही घटना उघडकीस आल्यानंतर पक्षाने तत्काळ निर्णय घेत राजेंद्र हगवणे यांची पक्षातून हकालपट्टी केली आहे. या प्रकरणाचा तीव्र निषेध करत, दोषींवर कठोर कारवाई व्हावी ही पक्षाची भूमिका असल्याचे स्पष्ट करण्यात आले आहे. तसेच कौटुंबिक वादामुळे पक्षाची बदनामी होऊ नये, यासाठी युवक प्रदेशाध्यक्ष सूरज चव्हाण यांनी माध्यमांमार्फत जनतेला विनंती केली आहे.