शिवशाही बसचा भीषण अपघात; सात प्रवाशांचा मृत्यू

गोंदिया, 29 नोव्हेंबर: (विश्वजीत खाटमोडे) राज्यातील गोंदिया जिल्ह्यात आज (दि.29) राज्य परिवहन महामंडळाच्या शिवशाही बसचा भीषण अपघात झाला आहे. या अपघातात आतापर्यंत 7 जणांचा मृत्यू झाला आहे. तर 30 जण जखमी झाले आहेत. जखमींना सध्या रुग्णालयात उपचारांसाठी दाखल करण्यात आले आहे. या घटनेची माहिती मिळताच पोलीस आणि स्थानिक लोक घटनास्थळी दाखल झाले. त्यानंतर त्यांनी लगेचच याठिकाणी बचावकार्य सुरू केले. दरम्यान, या अपघातातील मृतांच्या नातेवाईकांना 10 लाख रुपयांची आर्थिक मदत देण्याचे आवाहन राज्याचे काळजीवाहू मुख्यमंत्री एकनाथ शिंदे यांनी दिले आहेत.

https://x.com/ANI/status/1862417879230292246?t=XJtzjhHDBmLJTxewOQn4-w&s=19

7 जागांचा मृत्यू, 30 जण जखमी

गोंदिया जिल्ह्यातील सडक अर्जुनी गावाजवळ आज दुपारच्या सुमारास राज्य परिवहन महामंडळाच्या शिवशाही बसचा अपघात झाला. ही बस नागपुरहून गोंदियाकडे येत होती. त्यावेळी या बसला रस्त्यात एक दुचाकी आडवी आली. या दुचाकीस्वाराला वाचविण्याच्या प्रयत्नात चालकाचे नियंत्रण सुटल्याने ही बस उलटली. त्यामुळे 7 प्रवाशांना आपला जीव गमवावा लागला. तर 30 जण जखमी झाले आहेत. जखमींना गोंदिया जिल्हा रुग्णालयात हलविण्यात आले आहे. दरम्यान, या अपघातातील मृतांची संख्या वाढण्याची शक्यता वर्तविण्यात येत आहे. तर या अपघाताच्या वेळी बसमध्ये 35 हून अधिक जण प्रवास करत होते.

https://x.com/Dev_Fadnavis/status/1862415575680455158?t=cQSAkd4q6XmpxdlSdX-_cw&s=19

देवेंद्र फडणवीस यांचे ट्विट

या अपघातानंतर राज्याचे माजी उपमुख्यमंत्री देवेंद्र फडणवीस यांनी ट्विट करून मृतांना श्रद्धांजली वाहिली आहे. “गोंदिया जिल्ह्यातील सडक अर्जुनी नजीक शिवशाही बसचा दुर्दैवी अपघात होऊन काही प्रवाशांचा मृत्यू झाल्याची घटना अतिशय दुर्दैवी आहे. मृतांना मी भावपूर्ण श्रद्धांजली अर्पण करतो. त्यांच्या कुटुंबीयांच्या दु:खात आम्ही सहभागी आहोत. या घटनेत जे लोक जखमी झाले, त्यांना खाजगी रुग्णालयात उपचार द्यावे लागले तरी ते तातडीने द्या, असे निर्देश देण्यात आले आहेत. आवश्यकता भासल्यास त्यांना नागपूरला हलविण्याची व्यवस्था करा, असेही मी गोंदियाच्या जिल्हाधिकार्‍यांना सांगितले आहे. प्रशासनातील वरिष्ठ अधिकारी घटनास्थळी पोहोचले असून, ते मदतकार्यासाठी समन्वय करीत आहेत. या घटनेतील जखमींना लवकर आराम पडावा, अशी मी ईश्वरचरणी प्रार्थना करतो.” असे ट्विट देवेंद्र फडणवीस यांनी केले आहे.