मुंबई, 20 जून: (विश्वजीत खाटमोडे) हिंजवडी औद्योगिक संघटनेच्या मागण्यांच्या संदर्भात राज्याचे उपमुख्यमंत्री अजित पवार यांनी बैठक घेतली. ही बैठक अजित पवार यांच्या मंत्रालयातील कक्षात पार पडली. या बैठकीला औद्योगिक विभागातील अनेक अधिकारी उपस्थित होते. या बैठकीत हिंजवडी औद्योगिक संघटनेच्या मागण्यांबाबत सविस्तर चर्चा करण्यात आली. तसेच या बैठकीतून अजित पवारांनी संबंधित अधिकाऱ्यांना विविध प्रकारच्या सूचना दिल्या. पुण्यातील जागतिक दर्जाचे आयटी हब अशी ओळख असणाऱ्या ‘राजीव गांधी माहिती तंत्रज्ञान उद्यान’ परिसरातील वाहतूक कोंडीची समस्या दूर करावी, असे निर्देश अजित पवारांनी या बैठकीतून दिले. तसेच एमआयडीसी परिसराबाहेरील काही ठिकाणी पावसाचे पाणी साचल्यामुळे वाहतूक कोंडी होत आहे. त्यामुळे या पाण्याचा निचरा होण्याची व्यवस्था उभारावी, असे निर्देश त्यांनी दिले आहेत.
https://x.com/AjitPawarSpeaks/status/1803440382799487437?s=19
अजित पवारांच्या अधिकाऱ्यांना सूचना
याशिवाय, हिंजवडी परिसरात नवीन उद्योग येण्यासाठी तात्काळ आवश्यक त्या उपाययोजना कराव्यात. या परिसरातील उद्योग, कर्मचारी आणि स्थानिक रहिवाशांच्या सोयीच्या दृष्टीने परिसरातील रस्त्यांचे रुंदीकरण, उड्डाणपूल, घनकचरा व्यवस्थापन प्रकल्प यांसारख्या पायाभूत सुविधा गतीने पूर्ण कराव्यात, असे निर्देश उपमुख्यमंत्री अजित पवार यांनी संबंधित वरिष्ठ अधिकाऱ्यांना या बैठकीत दिले. पुण्याच्या विविध भागांतून उद्योग, नोकरीनिमित्त हिंजवडी आयटी परिसरात येणाऱ्या वाहनांची संख्या मोठी आहे. त्या तुलनेत या ठिकाणचे रस्ते अरूंद आहेत, त्यामुळे नागरिकांना वाहतूक कोंडीच्या समस्येला तोंड द्यावे लागत आहे. वाहतूक कोंडीची समस्या दूर करण्यासाठी या भागातील रस्ते रुंद करावेत, सर्वच रस्त्यांवर सहा मार्गीका ठेवाव्यात, आवश्यक ठिकाणी उड्डाणपूल उभारावेत, सेवा रस्त्यांची रुंदी वाढवावी, उड्डाणपुलांच्या ठिकाणी असलेल्या केबल्ससाठी भूमिगत व्यवस्था उभारावी. अनधिकृत केबल्स काढून टाकाव्यात. रस्त्यालगत उभारण्यात आलेले अनधिकृत जाहिरात फलके काढून टाकून या परिसराचे सौंदर्यीकरण पूर्ववत करण्यात यावे. रस्त्यांवरील खड्डे भरावेत, दुभाजक आणि पदपथांच्या दुरुस्तीची कामे तातडीने मार्गी लावावीत, अशा सूचना अजित पवार यांनी दिल्या.
पायाभूत सुविधांची उभारणी करणे
“मागील काही वर्षांचा विचार करता हिंजवडी आयटी परिसरात वाहनांची इतकी रहदारी नव्हती. मात्र या परिसरात येणाऱ्या राष्ट्रीय-आंतरराष्ट्रीय दर्जाच्या कंपन्या तसेच परिसरात उभे राहणाऱ्या पूरक उद्योग आणि व्यवसायामुळे या भागात रहिवाशी आणि वाहनांची संख्या वाढत आहे. हिंजवडी परिसराचा वेगाने विकास करण्यासाठी या परिसरात पायाभूत सुविधांची गतीने उभारणी करणे गरजेचं आहे. त्यामुळे संबंधित सर्व यंत्रणांच्या प्रमुखांनी विभागीय आयुक्तांच्या मार्गदर्शनाखाली येत्या शुक्रवारी आणि शनिवारी या भागाची पाहणी करून आवश्यक उपाययोजना करण्याची कार्यवाही करावी,” असे निर्देश वरिष्ठ अधिकाऱ्यांना दिले असल्याची माहिती अजित पवार यांनी यावेळी दिली.
उद्योजकांना येणाऱ्या अडचणींचे निराकरण
महाराष्ट्र औद्योगिक विकास महामंडळाच्या माध्यमातून हिंजवडी, माण आणि मारुंजी गावच्या हद्दीत तीन टप्प्यांत राजीव गांधी माहिती तंत्रज्ञान उद्यान विकसित करण्यात आले आहे. जागतिक पातळीवर त्याची आयटी हब म्हणून वेगळी ओळख निर्माण झाली आहे. येथील कंपन्यांना उद्योग सुलभ वातावरण देण्यास राज्य सरकारने प्राधान्य दिले आहे. त्यामुळे पीएमआरडीए, पीसीएमसी, एमआयडीसी, पीडब्ल्यूडी आदी सरकारी यंत्रणांनी उद्योजकांना भेडसावणाऱ्या अडचणींचे समन्वयाने आणि जलदगतीने निराकरण करावे अशा सूचना अजित पवार यांनी या बैठकीतून वरिष्ठ अधिकाऱ्यांना केल्या आहेत.
घनकचरा व्यवस्थापनासाठी प्रकल्प
महाराष्ट्र औद्योगिक विकास महामंडळ आपल्या हद्दीतील घनकचरा व्यवस्थापनासाठी 10 मेट्रिक टन क्षमतेचा प्रकल्प उभारत आहे. मात्र, एमआयडीसी परिसराच्या जवळील ग्रामपंचायत हद्दीतील घनकचऱ्यावर प्रक्रिया होणे आवश्यक आहे. त्यामुळे जिल्हा परिषदेच्या मुख्य कार्यकारी अधिकाऱ्यांनी 100 मेट्रिक टन क्षमतेचा प्रकल्प उभारण्यासाठी आवश्यक कार्यवाही सुरू करावी. एमआयडीसी हद्दीत कायदा सुव्यवस्थेच्या दृष्टीने पोलीस चौकी उभारावी. यासाठी हिंजवडी औद्योगिक संघटनेने सहकार्य करावे, असे या बैठकीत सूचित करण्यात आल्याची माहिती अजित पवारांनी दिली आहे.
