मुंबई, 10 जून: (विश्वजीत खाटमोडे) महाराष्ट्रात मान्सून दाखल झाला आहे. त्यानंतर राज्यातील अनेक जिल्ह्यांत पावसाला सुरूवात झाली आहे. या पार्श्वभूमीवर, राज्याचे उपमुख्यमंत्री अजित पवार यांनी आज राज्यातील पर्जन्यमान, खते, बी-बियाणे पुरवठा, पीक कर्ज वितरण, टँकरची स्थिती, धरणांतील पाणीसाठा व विसर्गाचे नियोजन, पूर नियंत्रण, चारा उपलब्धता यासंदर्भात व्हिडिओ कॉन्फरन्सिंगद्वारे आढावा घेतला. यावेळी अजित पवार यांनी सबंधित अधिकाऱ्यांना विविध प्रकारच्या सूचना दिल्या. तसेच याप्रसंगी पुणे विभागीय आयुक्तांनी आषाढी वारीच्या नियोजनाबाबतची सर्व माहिती अजित पवारांना दिली. त्यानंतर अजित पवार यांनी आषाढी वारीसाठी मंजूर निधी ताबडतोब वितरित करण्याचे निर्देश यावेळी अधिकाऱ्यांना दिले.
https://twitter.com/AjitPawarSpeaks/status/1800096262659907844?s=19
बियाणे, खतांचा पुरवठा करा
राज्यात पुणे विभागासह कोकण प्रदेशात चांगला पाऊस झाला आहे, तर अन्य भागात मध्यम स्वरूपाचा पाऊस होत आहे. हवामान विभागाच्या अंदाजानुसार राज्यात समाधानकारक पाऊस अपेक्षित आहे. पावसाच्या आगमनानंतर शेतकरी खरीप पिकांच्या पेरणीच्या तयारीला लागला आहे. त्यामुळे खते-बियाण्यांच्या अभावी कुठेही पेरण्यांना विलंब होता कामा नये. त्यासाठी शेतकऱ्यांना आवश्यक प्रमाणात बियाणे, खतांचा पुरवठा करा. तसंच प्रत्येक पात्र शेतकऱ्याला पीक कर्ज मिळण्याची दक्षता घ्या, असे निर्देश अजित पवार यांनी यावेळी सर्व विभागीय आयुक्तांना दिले.
धरणांमधील पाणी सोडण्याबाबत
हवामान विभागाच्या अंदाजानुसार पाऊस सरासरीपेक्षा जास्त पडणार असल्यामुळे धरणांमधील पाणी सोडण्याचं काटेकोर नियोजन करावे. आंतरराज्यीय धरणांवर जलसंपदा विभागाने आपला समन्वय अधिकारी नियुक्त करावा, त्याच्या माध्यमातून योग्यवेळी पाण्याच्या विसर्गाबाबत नियोजन करावे. पाण्याचा फुगवटा निर्माण होऊन शहरे, गावांत पाणी येणार नाही याची काळजी घ्यावी. आलमट्टी धरणाच्या पाण्यामुळे कोल्हापूर शहरात पुराची समस्या येऊ नये, यासाठी आतापासून नियोजन करावे. तसेच मेडिगट्टा, गोसीखुर्द धरणाबाबतही सतर्क राहून गडचिरोली जिल्ह्यात पूरस्थिती निर्माण होणार नाही, याबाबत काळजी घ्यावी, असे निर्देश यावेळी अजित पवार यांनी संबंधित अधिकाऱ्यांना दिले.
पूरस्थितीबाबत लोकांना सतर्क करावे
पाऊसमान चांगले असल्यामुळे पाणी तुंबणे, अनियंत्रित विसर्गामुळे पूर येणे आदींबाबत यंत्रणांनी काळजी घ्यावी. पूरस्थिती निर्माण झाल्यास नागरिकांना जिल्हाधिकाऱ्यांमार्फत पूर्वसूचना देऊन सतर्क करावे. अशा परिस्थितीत नागरिकांना दिलासा देण्याचा, वेळेवर मदत व पुनर्वसनाचे सर्व उपाय योजण्याचा प्रयत्न करावा. जलसंपदा विभागाने धरणांमधील पाणी सोडण्याबाबत योग्य ते नियोजन करावे. याबाबत अन्य यंत्रणांशी समन्वय ठेवावा. शेतकऱ्यांना पीक कर्ज वेळेवर उपलब्ध होईल याबाबत बँकांना सूचना द्याव्यात, असेही निर्देश यावेळी त्यांनी अधिकाऱ्यांना दिले.
पुणे शहरातील साचणाऱ्या पाण्याबाबत
तसेच पहिल्याच पावसात पुणे शहरातील विविध भागात पाणी साचल्याचे दिसून आले. महानगरपालिकेने याबाबत त्वरित आवश्यक उपाययोजना कराव्यात. मोठ्या पावसात पाण्याचा योग्य निचरा होण्यासाठी आवश्यक नियोजन करण्यात यावे. राज्यात काही भागात 100 मिलिमीटर किंवा त्यापेक्षा जास्त पाऊस पडला आहे. अशा परिस्थितीत वापसा आल्यानंतरच पेरण्यांचे नियोजन करावे. त्याचप्रमाणे पुरेसा पाऊस पडला नसलेल्या ठिकाणी चांगला पाऊस पडल्यानंतरच शेतकऱ्यांनी पेरणी करावी, यासाठी कृषी विभागाच्या समन्वयाने जनजागृती करावी, अशा सूचना अजित पवारांनी संबंधित अधिकाऱ्यांना केल्या आहेत.
