बारामती, 20 एप्रिल: (विश्वजीत खाटमोडे) राज्यातील लोकसभा निवडणुकीच्या तिसऱ्या टप्प्यातील मतदानासाठी उमेदवारी अर्ज दाखल करण्याचा काल शेवटचा दिवस होता. उमेदवारी अर्ज दाखल करण्याच्या शेवटच्या दिवसापर्यंत राज्यातील एकूण 361 उमेदवारांनी तब्बल 522 अर्ज दाखल केले आहेत. या संदर्भातील माहिती मुख्य निवडणूक अधिकारी कार्यालयाने दिली आहे. यामध्ये उस्मानाबाद लोकसभा मतदार संघातील 36 उमेदवारांनी सर्वाधिक 77 उमेदवारी अर्ज दाखल केले आहेत. तसेच बारामती मतदार संघात 51 उमेदवारांनी 66 अर्ज दाखल केले असल्याची माहिती त्यांनी दिली आहे.
पाहा कोणत्या मतदार संघात किती अर्ज?
रायगड लोकसभा मतदार संघात 28 उमेदवारांनी 40 अर्ज दाखल केले आहेत. तसेच बारामतीमध्ये 51 उमेदवारांनी 66 अर्ज, उस्मानाबाद येथे 36 उमेदवारांनी 77 अर्ज, लातूरमध्ये 36 उमेदवारांनी 50 अर्ज, सोलापूरात 41 उमेदवारांनी 53 अर्ज, माढा लोकसभा मतदार संघात 42 उमेदवारांनी 55 अर्ज, सांगलीत 30 उमेदवारांनी 39 अर्ज, साताऱ्यात 24 उमेदवारांनी 33 अर्ज, रत्नागिरी -सिंधुदुर्ग मध्ये 9 उमेदवारांनी 13 अर्ज, कोल्हापूर मतदार संघात 48 उमेदवारांनी 41 अर्ज आणि हातकणंगले लोकसभा मतदारसंघात 36 उमेदवारांनी 55 अर्ज दाखल केले आहेत.
22 तारखेपर्यंत अर्ज मागे घेण्याची मुदत
दरम्यान, महाराष्ट्रात लोकसभा निवडणुकीच्या तिसऱ्या टप्प्यात 11 मतदारसंघात 7 मे रोजी मतदान होणार आहे. त्यासाठी उमेदवारी अर्ज दाखल करण्याचा काल शेवटचा दिवस होता. या उमेदवारी अर्जांची छाननी आज (दि.20) करण्यात येणार आहे. तर हे उमेदवारी अर्ज मागे घेण्याची अंतिम मुदत 22 एप्रिलपर्यंत असणार आहे. या निवडणुकीचा निकाल 4 जून रोजी लागणार आहे.
