दिल्ली, 20 एप्रिल: (विश्वजीत खाटमोडे) लोकसभा निवडणुकीच्या पहिल्या टप्प्यात काल देशातील 21 राज्ये आणि केंद्रशासित प्रदेशांमध्ये मतदान पार पडले. देशातील पहिल्या टप्प्यातील मतदानाची आकडेवारी समोर आली आहे. लोकसभा निवडणुकीच्या पहिल्या टप्प्यात देशात काल 21 राज्ये आणि केंद्रशासित प्रदेशांमधील 102 जागांवर जवळपास सरासरी 63 टक्के मतदान झाले आहे. यामध्ये त्रिपुरा येथे सर्वाधिक 80.17 टक्के मतदान झाले. तर यावेळी बिहारमध्ये सर्वात कमी 48.50 टक्के मतदान झाले आहे.
https://twitter.com/ddsahyadrinews/status/1781528218647818371?s=19
राज्यांतील मतदानाची सरासरी आकडेवारी
देशातील अंदमान निकोबार बेट 56.87 टक्के, अरूणाचल प्रदेश 67.15 टक्के, आसाम 72.10 टक्के, बिहार 48.50 टक्के, छत्तीसगड 63.41 टक्के, जम्मू-काश्मीर 65.08 टक्के, लक्षदीप 59.02, मध्यप्रदेश 64.77, महाराष्ट्र 55.35 टक्के, मणिपूर 69.13 टक्के, मेघालय 74.21 टक्के, मिझोराम 54.23 टक्के, नागालँड 56.91 टक्के, पॉंडिचेरी 73.50 टक्के, राजस्थान 56.58 टक्के, सिक्कीम 69.47 टक्के, तामिळनाडू 65.19, त्रिपुरा 80.17 टक्के, उत्तर प्रदेश 58.49 टक्के, उत्तराखंड 54.06 टक्के आणि पश्चिम बंगाल 77.57 टक्के इतके मतदान झाले आहे.
मतदारांचा उत्साहात सहभाग
दरम्यान, देशभरात काल दिवसभर कडक ऊन होते. अशा उन्हाच्या वातावरणात देखील काल देशात लोकसभा निवडणुकीच्या पहिल्या टप्प्यात प्रचंड मतदानाची नोंद झाली आहे. या निवडणुका शांततापूर्ण आणि अनुकूल वातावरणात पार पडल्या. लोकशाहीच्या या उत्सवात देशातील मतदारांनी उत्साहाने सहभाग घेतला. यामध्ये शहरी मतदान केंद्रांपासून ते दुर्गम गावांपर्यंतच्या मतदान केंद्रांवर मतदारांचा सहभाग दिसून आला. निवडणूक आयोगाने देशातील मतदान केंद्रांवर चांगल्या नियोजनाच्या आधारे मतदानाची चोख व्यवस्था केली होती. तसेच देशातील सर्वच मतदान केंद्रावर मोठा पोलीस बंदोबस्त तैनात करण्यात आला होता.
