पुरंदर, 04 मार्च: (विश्वजीत खाटमोडे) पुरंदर तालुक्यातील मावडी कडेपठार गावात कांदा आणि लसणाच्या शेतात बेकायदेशीरपणे अफूची शेती केल्याप्रकरणी पोलिसांनी दोघांना अटक केली आहे. रोहिदास जगताप (55) आणि किरण जगताप (40) असे अटक केलेल्यांची नावे आहेत. याप्रकरणी त्यांच्या विरोधात जेजुरी पोलीस ठाण्यात गुन्हा दाखल झाला आहे. दरम्यान, काही दिवसांपूर्वी पुरंदर तालुक्यातील कोडीत गावात अफूची शेती केल्याचा पोलिसांनी पर्दाफाश केला होता. त्यानंतर आता पुरंदर तालुक्यात पुन्हा एकदा बेकायदेशीर अफूची शेती केल्याचे उघडकीस आल्यामुळे पोलीस प्रशासन सतर्क झाले आहे.
38 किलो वजनाची अफूची झाडे जप्त
दरम्यान, मावडी कडेपठार येथे कांदा आणि लसणाच्या शेतात बेकायदेशीरपणे अफूची शेती केली असल्याची माहिती जेजुरी पोलिसांना मिळाली. त्यानंतर पोलिसांनी एक पथक तयार केले. तसेच पोलिसांनी यावेळी मिळालेल्या माहितीच्या आधारे, सापळा रचून रोहिदास जगताप आणि किरण जगताप यांच्या शेतात छापा टाकला. यावेळी पोलिसांनी त्यांच्या शेतातील 38 किलो वजनाची अफूची झाडे जप्त केली. त्याची किंमत जवळपास 75 हजार रुपये इतकी आहे. याप्रकरणी पोलिसांनी या दोघांना अटक केली. याप्रकरणाचा सध्या पोलीस तपास करीत आहेत.
याच्या आधीही असाच प्रकार उघडकीस
काही दिवसांपूर्वी पुरंदर तालुक्यातील सासवड परिसरातील कोडीत या गावात कांद्याच्या शेतामध्ये बेकायदेशीरपणे अफूची लागवड केल्याप्रकरणी पोलिसांनी तानाजी बडदे आणि दशरथ बडदे या दोघांना अटक केली होती. दरम्यान, अंमली पदार्थ वनस्पतींची बेकायदेशीर लागवडीतुन झटपट पैसा कमविता येतो, अशी धारणा काही लोकांमध्ये आहे. कायद्याचा भंग करून अफू, गांजा अशा अंमली पदार्थांची लागवड करू नका. अन्यथा कडक कारवाई केली जाईल, असा इशारा पोलिसांनी दिला आहे.
