लोणावळा, 30 जून: (विश्वजीत खाटमोडे) पुण्यातील लोणावळा परिसरातील भुशी धरणाजवळील धबधब्यात 5 जण बुडाले असल्याची घटना घडली आहे. यामध्ये 1 महिला आणि 4 मुलांचा समावेश आहे. त्यापैकी दोघांचे मृतदेह बाहेर काढण्यात आले आहेत. या घटनेनंतर स्थानिक पोलीस आणि बचाव पथक घटनास्थळी दाखल झाले. सध्या या ठिकाणी बचावकार्य सुरू आहे. तर आता अन्य 3 जणांचा शोध घेतला जात आहे. दरम्यान, हे बुडालेले पाचही जण पुणे शहरातील सय्यद नगर येथील एकाच कुटुंबातील असल्याची माहिती पोलिसांनी दिली आहे.
https://x.com/ANI/status/1807371649710448737?s=19
तिघांचा शोध सुरू
लोणावळा परिसरातील भुशी धरणाच्या मागील एका टेकडीवर हा धबधबा आहे. या धबधब्यात पुणे शहरातील सय्यद नगर येथील एकाच कुटुंबातील 5 जण पर्यटनासाठी गेले होते. त्यावेळी त्यांचा पाय घसरल्याने ते पाण्यात पडले असण्याची शक्यता वर्तविण्यात येत आहे. या घटनेचा तपास पोलिसांकडून केला जात आहे. ही दुर्घटना आज दुपारी तीनच्या सुमारास घडली. घटनास्थळी शोध आणि बचाव पथक तैनात करण्यात आले आहेत. सध्या तिघांचा शोध घेतला जात आहे, अशी माहिती पुण्याचे पोलीस अधीक्षक पंकज देशमुख यांनी ही माहिती दिली आहे. दरम्यान, या दुर्घटनेमुळे धरण क्षेत्रात येणाऱ्या पर्यटकांनी स्वतःची काळजी घ्यावी, असे आवाहन करण्यात येत आहे.
भुशी डॅम ओव्हर फ्लो!
तत्पूर्वी, पुण्याच्या धरण क्षेत्रात सध्या जोरदार पाऊस पडत आहे. तसेच गेल्या काही दिवसांपासून लोणावळा परिसरात ही मुसळधार पाऊस सुरू आहे. या पावसामुळे लोणावळ्यातील भुशी डॅम ओव्हर फ्लो झाले आहे. त्यामुळे सध्या भुशी डॅमला भेट देण्यासाठी अनेक पर्यटक येत आहेत. त्यावेळी अनेक पर्यटकांनी या पावसाच्या वातावरणात धरणाच्या पाण्यात भिजण्याचा आनंद लुटला. तसेच आज रविवारची सुट्टी असल्यामुळे पर्यटकांची गर्दी वाढली होती. त्यामुळे या ठिकाणी वाहतुकीची कोंडी झालेली पाहायला मिळाली. या पार्श्वभूमीवर, येथे मोठा पोलीस बंदोबस्त तैनात करण्यात आला आहे.
