मुंबई, 11 नोव्हेंबर: (विश्वजीत खाटमोडे) राज्यात सध्या सर्वत्र विधानसभा निवडणुकीचे वातावरण आहे. या निवडणुकीसाठी सर्वच राजकीय पक्षांनी आपले उमेदवार दिले आहेत. परंतु, इतर निवडणुकांसारखे यंदाच्या विधानसभा निवडणुकीत ही अनेक राजकीय पक्षांना बंडखोरीचा फटका बसलेला होता. यामध्ये पक्षाकडून उमेदवारी मिळाली नसल्याने नाराज झालेल्या बहुसंख्य इच्छुक उमेदवारांनी या निवडणुकीत बंडखोरी करत आपल्या पक्षाच्या विरोधात उमेदवारी अर्ज दाखल केला. त्यामुळे अशा बंडखोर नेत्यांवर राजकीय पक्षांकडून कारवाई देखील करण्यात आली आहे. काँग्रेसने देखील रविवारी (दि.10) आपल्या पक्षातील 28 बंडखोर उमेदवारांना निलंबित केले आहे.
https://x.com/ANI/status/1855741739279290872?t=2c4ZzOfH2msE36f_FyIeUQ&s=19
.
6 वर्षांसाठी पक्षातून निलंबित
काँग्रेसने या बंडखोर उमेदवारांना पुढील 6 वर्षांसाठी पक्षातून निलंबित केले आहे. पक्षाच्या अधिकृत उमेदवारांच्या विरोधात बंडखोरी करण्यात आल्यामुळे या बंडखोर उमेदवारांची कृती पक्षशिस्तीचा भंग करणारी असल्याचे काँग्रेसने म्हटले आहे. त्यामुळे या बंडखोर उमेदवारांना काँग्रेस पक्षातून पुढील 6 वर्षासाठी निलंबित करण्यात आले आहे. ही कारवाई काँग्रेसचे महाराष्ट्र प्रभारी रमेश चेन्निथला यांच्या आदेशावरून आणि प्रदेशाध्यक्ष नाना पटोले यांच्या निर्देशावरून करण्यात आली आहे. या संदर्भातील प्रसिद्धी पत्रक काँग्रेस पक्षाने जारी केले आहे.
कोणत्या उमेदवारांवर कारवाई?
* आरमोरी विधानसभा मतदारसंघ – 1) शिलु चिमूरकर 2) आनंदराव गेडाम.
* गडचिरोली विधानसभा मतदारसंघ – 3) सोनल कोवे 4) भरत येरमे.
* बल्लारपूर विधानसभा मतदारसंघ – 5) अभिलाषा गावतूरे 6) राजु झोडे.
* भंडारा विधानसभा मतदारसंघ – 7) प्रेमसागर गणवीर.
* अर्जुनी मोरगांव विधानसभा मतदारसंघ – 8) अजय लांजेवार.
* भिवंडी विधानसभा मतदारसंघ – 9) विलास रघुनाथ पाटील 10) आसमा जव्वाद चिखलेकर.
* मिरा भाईंदर विधानसभा मतदारसंघ – 11) हंसकुमार पांडे.
* कसबा पेठ विधानसभा मतदारसंघ – 12) कमल व्यवहारे.
* पलूस कडेगाव विधानसभा मतदारसंघ – 13) मोहनराव दांडेकर.
* अहमदनगर शहर विधानसभा मतदारसंघ – 14) मंगल विलास भूजबळ.
* कोपरी पाचपाखाडी विधानसभा मतदारसंघ – 15) मनोज शिंदे 16) सुरेश पाटीलखेडे.
* उमरखेड विधानसभा मतदारसंघ – 17) विजय खडसे.
* यवतमाळ विधानसभा मतदारसंघ – 18) शबीर खान.
* राजापूर विधानसभा मतदारसंघ – 19) अविनाश लाड.
* काटोल विधानसभा मतदारसंघ – 20) याज्ञवल्क्य जिचकार.
* रामटेक विधानसभा मतदारसंघ – 21) राजेंद्र मुळक.
* सिंदखेडा विधानसभा मतदारसंघ – 22) शामकांत सनेर.
* श्रीवर्धन विधानसभा मतदारसंघ – 23) राजेंद्र ठाकूर.
* पर्वती विधानसभा मतदारसंघ – 24) आबा बागुल.
* शिवाजीनगर विधानसभा मतदारसंघ – 25) मनिष आनंद.
* परतूर विधानसभा मतदारसंघ – 26) सुरेशकुमार जेथलीया 27) कल्याण बोराडे.
* रामटेक विधानसभा मतदारसंघ – 28) चंद्रपाल चौकसे.
