बारामती,7 एप्रिलः खुनाच्या प्रयत्न करणाऱ्या फरार आरोपींच्या मुसक्या आवळण्यात बारामती तालुका पोलिसांना यश आले आहे. या धडाकेबाज कामगिरीमुळे बारामती तालुका पोलिसांचे कौतुक होत आहे. या कारवाईत दोन आरोपींना अटक करण्यात आली आहे.
दरम्यान, 22 मार्च 2022 रोजी 11 च्या सुमारास तक्रारदार अर्चना तात्याबा साळवे (रा. वडगाव निंबाळकर सध्या रा. सूर्यनगरी ता. बारामती जि. पुणे) यांनी तांदूळवाडी येथील मीनाक्षी विनायक जाधव व प्रदुम चव्हाण यांच्याकडून दोन पत्र्याच्या खोल्या सह एक गुंठा जागा 6 लाख रुपये किंमतीने विकत घेतली होती. सदर जमिनीची विसार पावती करून देखील यातील मीनाक्षी जाधव व प्रदूम चव्हाण हे जागा नावावर करत नव्हते, म्हणून तक्रारदार यांनी आम्हाला तुमची जागा नको, आमचे पैसे परत द्या, असे म्हणून पैशाची मागणी आरोपी यांच्याकडे केली. या कारणावरून यातील आरोपी प्रदुम चव्हाण याने तांदुळवाडी ते प्रगतीनगरकडे जाणारे रोडवर फिर्यादी व फिर्यादीची मैत्रिण यांची गाडी तेथून जात असताना गाडी आडवी मारून खिशातून चाकू बाहेर काढला. तसेच चाकूने फिर्यादीच्या मानेवर जोरात वार करून ‘तुझा आज मर्डर करतो’ असे बोलत फिर्यादी यांची मैत्रीण रसिक दिलीप पंडित हिचे गालावर देखील चाकूने जोरात वार केला. त्या दोघींनाही गंभीर जखमी केले .तसेच मीनाक्षी जाधव हिनेदेखील लाथाबुक्क्यांनी त्या दोघींना मारहाण केली. दोघी रक्तबंबाळ झाल्याचे पाहून दोन्ही आरोपींनी तेथून पळ काढला.
तेथील लोकांनी जखमींना बारामती हॉस्पिटल येथे भरती केले. हॉस्पिटलमध्ये फिर्यादी यांनी त्यांचा खून करण्याचा प्रयत्न केले बाबत तक्रार दिली. त्या अनुषंगाने बारामती तालुका पोलीस स्टेशन येथे गु.रजि. नंबर 172 / 22 भादवि कलम 307, 341 ,323 ,504, 506,34 अन्वये गुन्हा दाखल करण्यात आला होता. सदर गुन्ह्याचा तपास पोलीस उपनिरीक्षक धोत्रे हे करीत होते.
गुन्हा दाखल झालेल्या दिवसापासून यातील आरोपी हे पोलिसांना चकमा देत आपले राहण्याचे ठिकाण वेळोवेळी बदलून आज पर्यंत फरार होते. सदर गुन्ह्याचे गांभीर्य लक्षात घेऊन पोलीस निरीक्षक ढवाण यांनी पोलीस स्टेशनचे तपास पथक पोलीस हवालदार राम कानगुडे, पोलीस कॉन्स्टेबल प्रशांत राऊत यांना सदर आरोपीचा तात्काळ शोध घेण्याबाबत आदेश दिले.
आरोपींचा शोध घेत असताना कोणताही पुरावा नसताना तांत्रिक साधनांच्या मदतीने कसोशीने आरोपीचा शोध घेऊन दिनांक 5 एप्रिल 2022 रोजी कोल्हापूर या ठिकाणी आरोपी राहत असल्याचे माहिती मिळाल्याने कोल्हापूर या ठिकाणी जाऊन गावापासून लांब फार्म हाऊसवर असलेले आरोपी मोठ्या शिताफीने आरोपींच्या मुसक्या आवळून बारामती तालुका पोलिसांनी ताब्यात घेतले.
सदरची कारवाई पोलीस अधीक्षक अभिनव देशमुख पुणे ग्रामीण, अप्पर पोलीस अधीक्षक मिलिंद मोहिते बारामती विभाग उपविभागीय, पोलिस अधिकारी गणेश इंगळे बारामती विभाग यांच्या मार्गदर्शनाखाली पोलिस निरीक्षक महेश ढवाण बारामती तालुका पोलीस स्टेशन तसेच पोलीस हवालदार राम कानगुडे, पोलीस नाईक अमोल नरुटे, पोलीस नाईक रणजीत मुळीक, पोलीस कॉन्स्टेबल प्रशांत राऊत, महिला पोलीस नाईक सोनाली मोटे यांनी केली आहे. गुन्ह्याचा पुढील अधिक तपास पोलीस उपनिरीक्षक धोत्रे करीत आहेत.
